,,რესპუბლიკური პარტიის“ ინიციატივით, დღეს, პრემიერ-მინისტრთან შეხვედრა გაიმართება. პარტიის თავმჯდომარის, ხათუნა სამნიძის განცხადებით, აღნიშნულ შეხვედრამდე კომენტარები არ გაკეთდება.
„რესპუბლიკური პარტიის წინადადებით, მოულოდნელად შექმნილ რთულ პოლიტიკურ ვითარებაში სიცხადის შესატანად, პრემიერ მინისტრ გიორგი კვირიკაშვილთან დაინიშნა პარტიის უფლებამოსილი პირების შეხვედრა, რომელიც გაიმართება დღესვე. რესპუბლიკური პარტია კომენტარებს აღნიშნულ შეხვედრამდე არ გააკეთებს“, - აცხადებს სამნიძე.
პრემიერმა გიორგი კვირიკაშვილმა დღეს გავრცელებულ საგანგებო განცხადებაში აღნიშნა, რომ დაუშვებელია, ჯარისკაცები და ოფიცრები პოლიტიკაში აღმოჩნდნენ ჩართული. პრემიერის განცხადებით, ასევე, მიუღებელია თავდაცვის მინისტრის მხრიდან პოლიტიკურ დაპირისპირებაში ჩართვა.
პრემიერ-მინისტრი გიორგი კვირიკაშვილი მოუწოდებს პოლიტიკურ პარტნიორებს, ნებისმიერი სადავო საკითხი მხოლოდ კოალიციის შიგნით განიხილონ. მისი თქმით, წინააღმდეგ შემთხვევაში, აუცილებლად განახორციელებს ცვლილებებს, რომლებიც უზრუნველყოფს მთავრობის სტაბილურ ფუნქციონირებას და პოლიტიკური პროცესის ჯანსაღ ჩარჩოებში მოქცევას.
