ადიგენში მოსახლეობამ შეთანხმებას მიაღწია, რომლის თანახმადაც სოფელში იქნება ერთი სასაფლაო, ორი დამოუკიდებელი შესასვლელით.
,,კურიერის“ ინფორმაციით, სოფელში, სადაო მიწაზე ერთად იყვნენ შეკრებილი როგორც მუსლიმი, ასევე მართლმადიდებელი თემის წარმომადგენლები. ადგილზე იმყოფებოდნენ სასულიერო პირები, გამგებელი და გუბერნატორი.
ინციდენტზე, რომელიც სადაო სასაფლაოს გამო მოხდა, გამოძიება მიმდინარეობს. ოფიციალური ინფორმაციით, მსუბუქი ხარისხის დაზიანებები მიიღეს მუსლიმი თემის წარმომადგენლებმა. დღეს ადგილობრივები აცხადებენ, რომ დაპირისპირება არ ყოფილა.
პრობლემა მუსლიმი თემის წარმომადგენლებს სოფელ ადიგენში გასულ წელს მაშინ შეექმნათ, როდესაც ერთ-ერთი მუსლიმი გარდაიცვალა და მის ოჯახს მართლმადიდებლების სასაფლაოზე მისი დაკრძალვის უფლება ადგილობრივებმა არ მისცეს. არსებული ინფორმაციით, ოჯახმა ის მეზობელ სოფელში, ნათესავების სასაფლაოზე დაკრძალა.
