ერთიანი ნაციონალური მოძრაობის ლიდერებმა დაღუპული იუნკერების ხსოვნას პატივი მიაგეს. გიგა ბოკერიამ იუნკერების მემორიალთან განაცხადა, რომ მათ თავგანწირვას ჰქონდა უზარმაზარი მნიშვნელობა საქართველოს თავისუფლებისათვის ბრძოლაში.
"ძალიან მძიმე დღეა, საქართველოს თავისუფლება შეეწირა ამ დღეებს. ჩვენი ქვეყანა იქნა ოკუპირებული და ანექსირებული. იმ ადამიანების თავგანწირვამ, ვისაც დღეს პატივს მივაგებთ, ჩვენ ყველას, დღევანდელ და მომავალ თაობებს მოგვცა შანსი, რომ ვიბრძოლოთ და მივაღწიოთ სრულფასოვან თავისუფლებას. ეს ხალხი ფიზიკურად დამარცხდა, მათ შანსი ფიზიკური გამარჯვებისა ისტორიული გარემოების გამო არც ჰქონდათ, მაგრამ თავგანწირვას ჰქონდა უზარმაზარი მნიშვნელობა და სწორედ ამიტომ პატივი უნდა მივაგოთ მათ ხსოვნას", - განაცხადა გიგა ბოკერიამ.
დაღუპული იუნკერების პატივსაცემად კოჯორი-ტაბახმელას გზაზე, სადაც ახალაგზრდები საბჭოთა ჯარს დაუპირისპირდნენ, პოლიტიკოსები და საზოგადოებისთვის ცნობილი სახეები იკრიბებიან.
