ალექსი ბატიაშვილის ინფორმაციით, იგივე მომსახურებაში, რომელშიც "სილქნეტი" თავდაცვის სამინისტროს 1000 ლარს სთხოვდა, შსს "დელტაკომს" 350 000 ლარს უხდიდა. ამის შესახებ ე.წ. კაბელების საქმეზე მოწმემ, თავდაცვის ყოფილი მინისტრის მოადგილემ, დღევანდელი დაკითხვისას განაცხადა.
,,"დელტაკომი" იგივე მომსახურებას, რომელსაც "სილქნეტი" უწევს თავდაცვის სამინისტროს ახორციელებს შს საქმეთა სამინისტროსთვის და თვეში ამისთვის იღებდა 350 000 ლარს. თავდაცვის სამინისტროს კი, "სილქნეტი" სთხოვდა 1000 ლარს სიმბოლურად”, - აღნიშნა ბატიაშვილმა.
შს სამინისტროსა და "დელტაკომის" ურთიერთობის დეტალებზე სასაუბროდ სასამართლო სხდომა დაიხურა და ბატიაშვილს პროკურორები დახურულ რეჟიმში დაუსვამენ შეკითხვებს.
ე.წ. კაბელების საქმის პროკურორმა ნინო აღლემაშვილმა პროცესის დაწყებამდე განაცხადა, რომ ალექსი ბატიაშვილი არ არის მნიშვნელოვანი მოწმე, რადგან გამოძიების პროცესში ვერაფერი გაიხსენა. ამის შესახებ პროკურორმა ბატიაშვილის განცხადების შეფასებისას აღნიშნა, რომლის თანახმადაც ,,სილქნეტთან“ გაფორმებული ხელშეკრულება საქართველოს უსაფრთხოებისთვის ძალიან მნიშვნელოვანი იყო.
