საქართველოს პრეზიდენტის მრჩეველი ადამიანის უფლებებისა და მართლმსაჯულების საკითხებში კახა კოჟორიძე საქართველოს პრეზიდენტის მიერ დასმულ კითხვებთან დაკავშირებით პროკურატურის პასუხს მნიშვნელოვანს უწოდებს და აცხადებს, რომ პრეზიდენტმა სწორედ საზოგადოების დაცულობის და ინფორმაციის მიწოდების მიზნით ითხოვა ადამიანის წამებისა და არაადამიანური მოპყრობის დანაშაულებზე არსებული ინფორმაციის გასაჯაროება.
„საზოგადოებამ უნდა იცოდეს განხორციელდა თუ არა, მართლმსაჯულება სისტემური და ძალადობრივი დანაშაულის მიმართ. კითხვები კვლავ არსებობს, მაგრამ პროკურატურის მიერ მოწოდებული ინფორმაცია, იმაზე მეტი იყო, რაც დღემდე ჰქონდა საზოგადოებას. ამ საკითხით ჩვენ კვლავ დაინტერესებულნი ვართ და უახლოეს მომავალში შედგება შეხვედრები მთავარ პროკურატურასთან და სახალხო დამცველთან“, - განაცხადა კახა კოჟორიძემ.
შეგახსენებთ, პრეზიდენტმა პროკურატურას 6 კითხვით მიმართა. კერძოდ:
1.წამებისა და არაადამიანური მოპყრობის მუხლებით რამდენი პირის მიმართ დადგა გამამტყუნებელი განაჩენი?
2. აღნიშნული გამამტყუნებელი განაჩენებიდან რამდენ პირს გაუფორმდა საპროცესო შეთანხმება? თითოეულ შემთხვევაში რა სასჯელზე მოხდა შეთანხმება?
3. აღნიშნული მუხლებით რამდენი პირის მიმართ მიმდინარეობს სისხლის სამართლის საქმის განხილვა სასამართლოში?
4. იმავე მუხლებით რამდენი პირია ბრალდებულად ცნობილი? (ვგულისხმობთ საქმეებს, სადაც პირი ცნობილია ბრალდებულად, მაგრამ სასამართლოში არ არის საქმე გადაგზავნილი, ასეთის არსებობის შემთხვევაში.)
5. იმავე მუხლებით რამდენ საქმეზე მიმდინარეობს და რა ეტაპზეა გამოძიება?
6. რამდენი პირის მიმართ დადგა გამამტყუნებელი განაჩენი ათასობით აღმოჩენილ უკანონო, ფარულ ჩანაწერებთან დაკავშირებით? რამდენი პირის მიმართ არის დაწყებული დევნა?