,,ეს არის საერთო ტრაგედია. გთხოვთ, გავერთიანდეთ ჩვენი მიცვალებულების გასაპატიოსნებლად”, - ამის შესახებ ბიძინა კუჭავას მეუღლემ მარინა ნიკოლოზაშვილმა მოკლული პროკურორის ვახტანგ ქირიას ოჯახს ჟურნალისტების მეშველობით მიმართავს და ოჯახს სამძიმარს უცხადებს.
იგი მოუწოდებს ქირიების ოჯახს, რომ საქმეში თავადაც ჩართონ დამოუკიდებელი ექსპერტები. მისი შეფასებით, კუჭავას ხასიათს გამოცდილი პროკურორი აუცილებლად ამოიცნობდა.
,,იქიდან გამომდინარე, რომ კარგი და ტკბილი ადამიანი იყო პაატა ქირია, ვუსამძიმრებ ოჯახს. ეს არის საერთო ტრაგედია. გთხოვთ, გავერთიანდეთ ჩვენი მიცვალებულების გასაპატიოსნებლად. ჩვენ უნდა გავზარდოთ შვილები, აქ არის შუღლი ჩადებული და ნათესავებს შორის ეს არ უნდა არსებობდეს. ჩვენ უკვე ჩავატარეთ დამოუკიდებელი ექსპერტიზა და მოვუწოდებთ პაატა ქირიას ოჯახს იქნებ თავადაც დაინტერესდნენ დამოუკიდებელი ექსპერტის ჩართვით ამ საქმეში, რათა გავაპატიოსნოთ ჩვენი მიცვალებულები. პაატა ქირიას და ბიძინა კუჭავას, ორივეს კარგად იცნობდნენ ზუგდიდში. პაატა ქირია იყო პატიოსანი ადამიანი, პროფესიონალი პროკურორი და არ არსებობდა, იგი აუცილებლად გაიცნობდა ბიძინა კუჭავას ხასიათს და თუკი ის მანიაკალური პიროვნება იყო, მასთან საქმეს არ დაიჭერდა", - განაცხადა მარინა ნიკოლოზაშვილმა და დასძინა, რომ გუშინ შს მინისტრის მოადგილის, არჩილ თალაკვაშის მიერ გაკეთებულმა განცხადებამ ჩირქი მოსცხო ბიძინა კუჭავას ოჯახს.
შსს მინისტრის მოადგილემ ,,მაესტროს“ ეთერში განაცხადა, რომ სამეგრელო-ზემო სვანეთის საოლქო სამხარეო პროკურორის მკვლელი დადგენილია.
,,არსებობს გამოძიების მიერ მოპოვებული საკმარისი მტკიცებულებები და იდენტიფიცირებული, რაც ადასტურებს, რომ სწორედ ბიძინა კუჭავამ მოკლა პროკურორი ვახტანგ ქირია, მაღალი ალბათობით, მკვლელმა ბიძინა კუჭავამ ძველით ახალი წლის ხმაურს დაამთხვია მისი მკვლელობა," - განმარტა არჩილ თალაკვაძემ.
