შინაგან საქმეთა მინისტრის მოადგილის განცხადებებს ბიძინა კუჭავას ადვოკატი გია გოროზია ეხმაურება და აცხადებს, რომ არჩილ თალაკვაძის კომენტარი აბსურდული და ნაჩქარევია.
ადვოკატი გამორიცხავს კუჭავას კავშირს მინისტრის მოადგილის მიერ დასახელებულ სხვა მკვლელობებთან.
"ასეთ მტკიცებით ფორმაში არ უნდა საუბრობდეს ბატონი თალაკვაძე. მე მას რომ ვუსმენდი, ის ნაწერს კითხულობდა, როგორც ჩანს უთხრეს, რომ მას ეს ნაწერი უნდა წაეკითხა და მან ეს პირნათლად შეასრულა," - აცხადებს გია გოროზია.
შსს მინისტრის მოადგილემ ,,მაესტროს“ ეთერში განაცხადა, რომ სამეგრელო-ზემო სვანეთის საოლქო სამხარეო პროკურორის მკვლელი დადგენილია.
,,არსებობს გამოძიების მიერ მოპოვებული საკმარისი მტკიცებულებები და იდენტიფიცირებული, რაც ადასტურებს, რომ სწორედ ბიძინა კუჭავამ მოკლა პროკურორი ვახტანგ ქირია, მაღალი ალბათობით, მკვლელმა ბიძინა კუჭავამ ძველით ახალი წლის ხმაურს დაამთხვია მისი მკვლელობა," - განმარტა არჩილ თალაკვაძემ.
ბიძინა კუჭავას ოჯახის წევრების მოთხოვნით, აღნიშნულ საქმეში დამოუკიდებელი ექსპერტი, მაია ნიკოლეიშვილი ჩაერთო.