იუსტიციის მინისტრმა თეა წულუკიანმა სირიაში დაღუპული პანკისელების ოჯახებს მიუსამძიმრა და ახალგაზრდებს მოუწოდა
დრო დაუთმონ საკუთარი ქვეყნის მომავალს და არა ტერორიზმის მიზნით ბრძოლას.
,,ეს არის ის დიდი სენი და დანაშაული, რომელსაც ჩვენ საერთაშორისო თანამშრომლობის ფარგლებში ვებრძვით. უკან არ დავიხევთ, მანამ, სანამ არ დამარცხდება ეს დიდი უბედურება, რასაც თანამედროვე სამყაროში ტერორიზმი ჰქვია. ამიტომაც, ახალგაზრდებმა ალბათ საკუთარ მომავალზე უნდა იზრუნონ, ჩაერთონ იმ საგანმანათლებლო პროგრამებში, რომელიც, მათ შორის პანკისის ხეობაში არსებობს და ნათელ მომავალზე იფიქრონ, ვიდრე ბოროტების მსახურებაზე“, - განაცხადა მინისტრმა.
იგი ვარაუდობს, რომ სირიაში დაღუპული ორი ახალგაზრდა მრავალი თვის წინ არის გასული საქართველოდან.
„თქვენ გახსოვთ, რომ ჩვენ მოვახდინეთ კრიმინალიზაცია ტერორიზმის მიზნით საქართველოდან სხვა ქვეყანაში გასვლის ქმედებასთან დაკავშირებით და ასევე, პროპაგანდის ნაწილში, ჩვენ შემოვიღეთ სისხლის სამართლის სანქციები, როდესაც კანონი გამკაცრდა, მას მერე ნაკლები პრობლემებია ჩვენი მოქალაქეებისთვის, პანკისიდან სხვა ქვეყნებში საომრად გასვლასთან დაკავშირებით, თუმცა, პრობლემა არსებობს. ეს ორი ადამიანი, როგორც ჩანს, მრავალი თვის წინ არის გასული საქართველოდან“, - განაცხადა წულუკიანმა.
სირიაში ორი პანკისელი ახალგაზრდა მამაკაცი დაიღუპა. ორივე მათგანი ტერორისტულ დაჯგუფება „ისლამური სახელმწიფოს“ რიგებში იბრძოდა. სირიაში ისინი დაახლოებით ერთი წლის წინ წავიდნენ.
