საბურთალოს რაიონის გამგეობამ ჩიქოვანის №30, 34 და 36 კორპუსებში ახალი სკვერების მოწყობა დაასრულა. ობიექტები თბილისის მერმა დავით ნარმანიამ საბურთალოს რაიონის გამგებელ ბექა მიქაუტაძესა და საბურთალოს მაჟორიტარ დეპუტატ დავით ზურაბიშვილთან ერთად დაათვალიერა.
ახალ სკვერებში მოპირკეთდა სასეირნო ბილიკები, დაიდგა ადგილობრივი წარმოების, ეკოლოგიურად სუფთა მასალისაგან დამზადებული საპარკო ინვენტარი, სკამები, საქანელები და სანაგვე ურნები; მოეწყო დეკორატიული განათების სისტემები.
აღნიშნული ტერიტორია საბურთალოს რაიონის ის ნაწილია, რომელიც 13 ივნისის სტიქიამ ყველაზე მეტად დააზარალა.
აღსანიშნავია, რომ პროექტის შედგენისას გათვალისწინებული იქნა ტერიტორიის ლანდშაფტი და დენდროლოგია, რის მიხედვითაც განისაზღვრა ტერიტორიის გამწვანების დეტალები. პარკებში დამონტაჟებულია ავტომატური მორწყვის სისტემა. ამ კორპუსებში, სარდაფის ტიპის ბინებში მცხოვრებმა მოსახლეობამ უკვე მიიღო მერიისაგან კომპენსაცია, არსებული ფართები კი სახელმწიფო საკუთრებაში გადავიდა.
„ეს ერთი-ერთი ადგილია, რომელიც სტიქიის დროს დაზიანდა. ძალიან მალე დავიწყეთ ამ ტერიტორიის დასუფთავება. შემდეგ მივიღეთ გადაწყვეტილება, გაგვეკეთებინა ეს პროექტი და მოგვეწყო სკვერები; აქ პატარები გაერთობიან, ივარჯიშებენ. ნამდვილად კარგი რამ გაკეთდა რაიონული გამგეობის მეშვეობით. ეს არ იქნება ერთადერთი, რასაც ამ ხეობაში გავაკეთებთ. აქტიურად გავაგრძელებთ მუშაობას, რომ უფრო მეტად მოწესრიგდეს ტერიტორია. მზიურის ტერიტორიაზე ვიმუშავებთ, იმისათვის, რომ მეტად გამწვანდეს და როგორც რეკრეაციული სივრცე, ისე განვითარდეს ეს ტერიტორია“,-განაცხადა დავით ნარმანიამ.
სკვერების კეთილმოწყობის პროექტის ფარგლებში, საბურთალოს რაიონის გამგეობამ უზრუნველყო ასევე №36 კორპუსის დაზიანებული ფასადის რეაბილიტაცია. აღსანიშნავია, ასევე, ის ფაქტი, რომ სკვერების მოწყობამდე, სამივე კორპუსში ჩატარდა გაწმენდითი სამუშაოები, მოეწყო სადრენაჟე სისტემები, რომელიც უზრუნველყოფს გრუნტის წყლების შეკრებას და გატარებას მდინარე ვერეს ხეობაში. საპროექტო სამუშაოები კომპანია „დიზაინ გრუპმა“ შეასრულა, სკვერების მოწყობაზე კი კომპანია „ჯეოპარკმა“ იმუშავა.
