საქართველოს ახალგაზრდა რკინიგზელთა ასოციაციამ საქველმოქმედო აქცია ,,შეიტანე შენი წვლილი და დაეხმარე მზრუნველობამოკლებულ პატარებს“ გამართა.
საქველმოქმედო აქციის ფარგლებში რკინიგზელებმა თბილისის # 200 სკოლა-პანსიონატის, ჩვილ ბავშვთა სახლისა და ლომისის ტაძრის მფარველობის ქვეშ არსებული ბავშვთა თავშესაფარის აღსაზრდელებს სათამაშოები, ტკბილეული და სამოსი გადასცეს.
აღნიშნულ აქციში მონაწილეობდნენ როგორც ახალგაზრდა რკინიგზელთა ასოციაციის წევრები, ასევე ს/ს ,,საქართველოს რკინიგზის“ თანამშრომლები ყველა რეგიონიდან.
,,საქართველოს ახალგაზრდა რკინიგზელთა ასოციაციის სახელით მადლობას ვუხდი ყველა იმ ადამიანს, ვინც საქველმოქმედო აქციაში მიიღო მონაწილეობა. სიკეთის კეთება გადამდებია და, მოხარული ვარ, რომ ჩვენს ამ აქციას, რკინიგზელების გარდა, კერძო კომპანიებიც შემოუერთდნენ. ასოციაციის საქველმოქმედო აქციებს პერმანენტული ხასიათი აქვთ და ჩვენ, შეძლებისდაგვარად, ვეცდებით გავახალისოთ და სითბო შევმატოთ იმ პატარების ყოველდღიურობას, რომლებსაც მშობლების ზრუნვა აკლიათ,“- განაცხადა საქართველოს ახალგაზრდა რკინიგზელთა ასოციაციის თავმჯდომარემ გოგა გელეიშვილმა.
საქველმოქმედო აქციაში განსაკუთრებული წვლილი შეიტანა შპს,,ტკბილმა ქვეყანამ“. საკონდიტრო ფაბრიკამ მზრუნველობამოკლებული ბავშვებისათვის რამდენიმე სახის ტკბილეული გამოყო. ეს არის ახალგაზრდა რკინიგზელთა ასოციაციის რიგით მეორე საქველმოქმედო აქცია. ასოციაციის წევრების გადაწყვეტილებით საქველმოქმედო აქციები პერმანენტულ ხასიათს მიიღებს.
