ენმ-ის ერთ-ერთი ლიდერის, დავით ბაქრაძის განცახადებით,

ამერიკელ პარტნიორებს ძალიან აღელვებთ საქართველოში მიმდინარე პროცესები.

აშშ-ის სახელმწიფო მდივნის მეორე მოადგილე, ბრიჯიტ ბრინკთან გამართული შეხვედრის შემდეგ ბაქრაძემ განაცხადა, რომ მთავარი ამოცანაა ქვეყანა არჩევნებამდე მშვიდად მივიდეს.

,,ეს იყო ძირითადი თემა, რაზეც ვისაუბრეთ. ამ თემის ფარგლებში, რა თქმა უნდა, მათ ძალიან აღელვებთ აქ მიმდინარე პროცესები. მათ შორის, ხელისუფლების დამოკიდებულება ოპოზიციის მიმართ, ასევე "რუსთავი 2"-ის საკითხი. დღეს კიდევ ერთხელ დავრწმუნდით, რამხელა პრობლემას გადაგვარჩინა საკონსტიტუციო სასამართლოს გადაწყვეტილებამ. რომ არ ყოფილიყო ეს გადაწყვეტილება, რომელმაც აიძულა ხელისუფლება, უკან დაეხია "რუსთავი 2"-თან მიმართებაში. დღეს ვიდგებოდით უზარმაზარი საერთაშორისო პრობლემის წინაშე", - განაცხადა ბაქრაძემ.

მისივე თქმით, საუბარი შეეხო ასევე ოკუპირებულ ტერიტორიებსაც, ასევე საგარეო საკითხებსაც.

,,ამერიკის მხარდაჭება რჩება მტკიცე და გადამწყვეტი საქართველოს მომავალი გაერთიანებისთვის, ასევე ვისაუბრეთ საგარეო პოლიტიკაზე, მათ შორის, ნატოზე, სადაც ამერიკის შეერთებული შტატების მხარდაჭერა ასევე არის ერთ-ერთი გადამწყვეტი გაწევრიანებისთვის", - განაცხადა ბაქრაძემ.
რაც შეეხება თავად ამერიკული მხარის პოზიციას, აღნიშნულ საკითხებთან დაკავშირებით, როგორც ბაქრაძემ აღნიშნა, მისი მხრიდან ამაზე საუბარი არასწორი იქნება.
"ჩვენი მთავრობის ზოგიერთი წევრისგან განსხვავებით, მე არ ვაპირებ კამერების წინ ჭორაობას, და მით უმეტეს, ტყუილებით ჭორაობას. არასწორი იქნება ჩემი მხრიდან. მე გავახმოვანე ჩვენი პარტნიორების პოზიცია. გავიმეორებ იმას, რომ მთავარი თემა იყო, თუ როგორ მოხდეს ქვეყანაში სიტუაციის ნორმალიზება", - განაცხადა ბაქრაძემ.