"რუსთავი 2"-ის ერთ-ერთი დამფუძნებლი და ამჟამად დროებით მმართველად დანიშნული დავით დვალი ხელისუფლებას აფრთხილებს, რომ აზრად არავის მოუვიდეს ტელევიზიის საქმიანობაში ჩარევა.
"თუ ვინმეს უხარია მთავრობაში, რომ ასეთი პროცესები მიდის "რუსთავი 2"-ის ირგვლივ, მინდა გავაფრთხილო, აზრად არავის მოუვიდეს ერთი ზარის განხორციელება და ტელევიზიის საქმიანობაში ჩარევა", - განაცხადა დავით დვალმა დღეს გამართულ სპეციალურ ბრიფინგზე.
მისივე თქმით, ის სამპუნქტიანი გეგმა, რომელიც "რუსთავი 2"-ის მომავალ საქმიანობასთან დაკავშირებით ჩამოყალიბდა, არის არა დვალის და აქიმიძის მოთხოვნები, არამედ ერთობლივი შეთანხმება ქიბარ ხალვაშთან.
"ჩვენი ხედვა ტელევიზიის მომავალთან დაკავშირებით ემთხვევა და ეს მაძლევს იმედს, რომ ამ თვალსაზრისით, არანაირი გაუგებრობები არ იქნება", - განაცხადა დავით დვალმა.
რაც შეეხება დროებით მმართველად დანიშვნას, როგორც დვალმა აღნიშნა, სხვა დროს ალბათ ამ წინადადებაზე უარს იტყოდა, სანამ ქიბარ ხალვაშის სასამართლო პროცესი ბოლომდე არ დასრულდებოდა, თუმცა ამ შემთხვევაში დროებით მმართველობაზე დათანხმება გამოიწვია იმ ინფორმაციებმა, რაც გავრცელდა და რამაც დაგვანახა, თუ რის წინაშეც ვდგავართ, მათ შორის, ფარულმა ჩანაწერებმა.
იმ ორი ადამიანის გარდა, ვისაც უფლებამოსილება აქვს შეჩერებული , "რუსთავი 2"-ს არც ერთი თანამშრომელი არ დატოვებს.
