ამერიკის შეერთებული შტატების სახელმწიფო დეპარტამენტში აშშ-საქართველოს სტრატეგიული პარტნიორობის ქარტიის კომისიის მეხუთე პლენარული სხდომა გაიმართა, რომლის შემდეგაც საქართველოს შესახებ ერთობლივი განცხადება მიიღეს.
იუსტიციის სამინისტროს ინფორმაციით, დოკუმენტში შეფასებულია საქართველოში დემოკრატიის განვითარების კუთხით არსებული ვითარება. ქვეყნის დემოკრატიზაციისა და რეფორმების მიმდინარეობის პროცესს კომისია დადებითად აფასებს. დოკუმენტში აღნიშნულია, რომ ძალისხმევა ამ მიმართულებით აძლიერებს ეკონომიკას, დემოკრატიასა და სამართლის უზენაესობას საქართველოში.
„სტრატეგიული პარტნიორობის ქარტიის კომისია მიესალმება რეფორმების კუთხით საქართველოს მიერ გაწეულ ძალისხმევას და აღნიშნავს, რომ დამატებითი ძალისხმევა ამ მიმართულებით ხელს შეუწყობს საქართველოს ეკონომიკის, დემოკრატიისა და კანონის უზენაესობის გაძლიერებას“, − ნათქვამია სახელმწიფო დეპარტამენტის განცხადებაში.
სტრატეგიული პარტნიორობის ქარტიის კომისიის მონაწილე ორივე მხარემ დაადასტურა ძლიერი და დამოუკიდებელი სასამართლო სისტემის არსებობის მნიშვნელობა. გარდა ამისა, აშშ მიესალმება გენერალური პროკურატურის მიმართულებით კონტროლის მექანიზმების გაძლიერებას. „ამერიკის შეერთებული შტატები მიესალმება საქართველოს მიერ გადადგმულ ნაბიჯებს გენერალური პროკურატურის, ძალოვანი და უსაფრთხოების სამსახურების ბალანსისა და კონტროლის მექანიზმების გაძლიერებისაკენ“, − ნათქვამია განცხადებაში.
მხარეებმა, ასევე, იმსჯელეს 2016 წლის ოქტომბრის საპარლამენტო არჩევნებამდე, არჩევნების პროცესში და არჩევნების შემდეგ პოლიტიკური პარტიებისა და კანდიდატებისთვის სამართლიანი, თანასწორი და კონკურენტული პირობების შექმნის მნიშვნელობაზე; ამასთან, შეთანხმდნენ ღია, პლურალისტური და დამოუკიდებელი მედიასივრცის შენარჩუნების აუცილებლობაზე.
ამერიკის შეერთებულმა შტატებმა კიდევ ერთხელ დაადასტურა საქართველოს ტერიტორიული მთლიანობის, სუვერენიტეტისა და დამოუკიდებლობის მიმართ მტკიცე მხარდაჭერა. აშშ-ის მხრიდან თანათავმჯდომარეებმა რუსეთის ფედერაციას კიდევ ერთხელ მოუწოდეს, შეასრულოს ცეცხლის შეწყვეტის შესახებ 2008 წლის შეთანხმებით ნაკისრი ვალდებულებები და მოიწონეს რუსეთის პროვოკაციებზე საქართველოს მთავრობის ზომიერი რეაქცია.
სტრატეგიული პარტნიორობის ქარტიის კომისია ამერიკის შეერთებულ შტატებსა და საქართველოს შორის სტრატეგიული ორმხრივი დიალოგის ძირითადი ფორმატია, რომლის მიზანსაც ქვეყნებს შორის თანამშრომლობის გაღრმავება და საქართველოს ევროატლანტიკური ინტეგრაციის ერთობლივი მიზნის ხელშეწყობა წარმოადგენს. ქარტიის კომისიამ ყურადღება გაამახვილა ორმხრივი თანამშრომლობის გაძლიერებაზე ისეთ სფეროებში, როგორიცაა: დემოკრატია, თავდაცვა და უსაფრთხოება, ეკონომიკა, ვაჭრობა და ენერგეტიკა, ხალხთაშორისი ურთიერთობები და კულტურული გაცვლები.
ამერიკის შეერთებული შტატების სახელმწიფო დეპარტამენტმა განცხადება 3 ნოემბერს გაავრცელა.
