პარლამენტის ევროინტერგაციის კომიტეტის თავმჯდომარის, ლევან ბერძენიშვილის მტკიცებით, საქართველოში სტალინის ძეგლს ვერავინ დადგამს.
როგორც ჟურნალისტებს ბერძენიშვილმა განუცხადა, სტალითან მიმართებაში სახელმწიფომ საკუთარი სიტყვა თქვა.
მისი თქმით, საბჭოთა სიმბოლიკისა და სტალინის ძეგლის დადგმის ყველანაირი მცდელობა აღკვეთილი იქნება, როგორც ეს ცოტა ხნის წინ მოხდა.
„უნდა ვიცოდეთ, რომ სტალინი გემოვნების საკითხი არ არის, ის ქვეყნის ევროპული ინტეგრაციის საკითხია და ვიღაცას შეიძლება გულში სტალინი კი არა, აღა-მაჰმად-ხანიც ჰყავს ამოჭედილი და ვინმეს ვიღაცის სიყვარულს ვერ დავუშლით, მაგრამ სახელმწიფო ხარჯებით ქვეყანაში სტალინის ძეგლი არ დაიდგმება და ყველაფერი გაკეთდა, რომ ახალგაზრდა თაობამ იცოდეს, კომუნისტებმა რა და როგორ ჩაიდინეს“, - განაცხადა ბერძენიშვილმა.
შეგახსენებთ, ზესტაფონის რაიონის სოფელ შორაპანში მოსახლეობამ სტალინის ძეგლი რამდენიმე დღის წინ აღმართა, თუმცა, შემდგომ მისი დემონტაჟი განხორციელდა.
