საქართველოსა და ისრაელის პარლამენტებს შორის ურთიერთთანამშრომლობის მემორანდუმი გაფორმდა.
საქართველოს პარლამენტს დღეს, ქნესეთის თავმჯდომარე იული ედელშტეინი ესტუმრა, რომელმაც ქართველ კოლეგასთან, დავით უსუფაშვილთან შეხვედრა გამართა, მოგვიანებით კი, მხარეების მონაწილეობით ბრიფინგი გაიმართა.
როგორც უსუფაშვილმა აღნიშნა, მემორანდუმი ორი ქვეყნის პარლამენტების შემდგომ თანამშრომლობას შეეხება.
მისი თქმით, მემორანდუმი ითვალისწინებს, არა მხოლოდ ორი ქვეყნის პარლამენტების თანამშრომლობის გაღრმავებას, არამედ ორი ხალხის ურთიერთობების შემდგომ განმტკიცებას.
„ამ მემორანდუმში ძალიან კონკრეტული საკითხებია იმისათვის, რომ ჩვენმა პარლამენტებმა ყოვედღიურ რეჟიმში ითანამშრომლონ, გამოცდილება გავცვალოთ და ერთმანეთი გავაძლიეროთ. ჩვენი სტუმრები კონკრეტული წარმატებული პროექტებით ჩამობრძანდნენ, რომელიც მათ ქნესეთში განახორციელეს - ეს არის მწვანე პარლამენტის კონცეფცია. ამ მიდგომით მათ ძალიან სერიოზული მიღწევების დემონსტრირება მოახერხეს, თუ როგორ შეიძლება მონდომობით სერიოზული შედეგის მიღება. ასევე გვესაუბრნენ, რა ღონისძიებებს ატარებენ შეზღუდული შესაძლებლობების მქონე პირთა ინტეგრირებისათვის პარლამენტის სისტემაში“, - განაცხადა უსუფაშვილმა.
სპიკერის ცნობით, მან ებრაელ კოლეგას გააცნო, საქართველოს პარლამენტის მიღწევები ღიაობის პროცესში.
