იუსტიციის სახლში თავისუფალი და სამართლიანი არჩევნებისთვის უწყებათაშორისი კომისიის მესამე სხდომა გაიმართა. კომისიის სხდომას იუსტიციის მინისტრი თეა წულუკიანი ხელმძღვანელობდა. სხდომის მუშაობაში მონაწილეობდნენ კომისიის წევრები; კვალიფიციური საარჩევნო სუბიექტების, სხვა პოლიტიკური პარტიებისა და საარჩევნო ბლოკების, ადგილობრივი და საერთაშორისო დამკვირვებელი ორგანიზაციების, ცენტრალური საარჩევნო კომისიის წარმომადგენლები.
დღევანდელ სხდომაზე პოლიტიკური პარტიების წესდებაში ცვლილებისას ნოტარიუსის ჩართულობაზე იმსჯელეს. როგორც მინისტრმა განაცხადა, აღნიშნულთან დაკავშირებით მოთხოვნა საბჭოში შემოვიდა. „ხანდახან პოლიტიკური პარტიები თავიანთ წესდებებში ცვლილებებს ისე ახორციელებენ, რომ ამისათვის ნოტარიუსის დასტური არ არის საჭირო, და შემდეგ თავმჯდომარეების, მმართველი პირების ცვლილება ისე ხდება ხოლმე, რომ პარტიის წევრები ერთმანეთს კოლეგიურად არ ეკითხებიან, და გადაწყვეტილება კანონით დადგენილი წესით არ ხდება. არის შემოთავაზება, რომ ნოტარიუსი ჩაერთოს წესდების ცვლილების პროცესშიც და ეს იყოს დამოწმებული პროცედურა“, − აღნიშნა იუსტიციის მინისტრმა.
გარდა ამისა, სხდომაზე იმსჯელეს საგარეჯოში წინასაარჩევნო კამპანიის მიმდინარეობაზე.
„შევიტყვეთ, რომ მაჟორიტარობის ერთ-ერთი კანდიდატი შეიჭრა მაჟორიტარობის მეორე კანდიდატის შეხვედრაზე. ჩვენ ეს კულტურა დიდი ხანია, დავასრულეთ და კიდევ ერთხელ მინდა, მოვუწოდო ყველა კანდიდატს, რომ დააცადონ ერთმანეთს ჯანსაღი შეჯიბრი და ხალხი გადაწყვეტს, საარჩევნო ყუთთან ვინ გახდება პარლამენტის წევრობის ღირსი.
ასევე, ჩვენ ვმუშაობთ იმაზე, რომ ისევ საგარეჯოში, ერთ-ერთი კანდიდატის ანგარიშები აქვს დაყადაღებული კრედიტორს. კრედიტორი გახლავთ მონაცემთა დაცვის ინსპექტორი. ჩვენ ვაწარმოეთ ინსპექტორთან მოლაპარაკებები და იმედი მაქვს, რომ კრედიტორი მომცემს უფლებას, კანდიდატს ყადაღა პირველ ნოემბრამდე მოეხსნას“, − განაცხადა იუსტიციის მინისტრმა.
პირველი სხდომა უწყებათაშორისმა კომისიამ 15 სექტემბერს გამართა. ოქტომბრის შუალედური არჩევნებისთვის უწყებათაშორისი კომისია იუსტიციის მინისტრის 1 სექტემბრის ბრძანებით შეიქმნა. მისი მიზანი 2015 წლის საქართველოს პარლამენტისა და საკრებულოს შუალედური არჩევნების დროს საჯარო მოსამსახურეების მხრიდან საარჩევნო კანონმდებლობის დარღვევის პრევენცია და გამოვლენილ დარღვევებზე რეაგირებაა, რაც შუალედური არჩევნებისთვის ხელს შეუწყობს თავისუფალი და სამართლიანი საარჩევნო გარემოს შექმნას.
