"ასამბლეის მიერ ადრე მიღებული გადაწყვეტილებები ანგაჟირებული ხასიათისაა,მათი მიხედვით საქართველოსგან სრულიად მოხსნილია ბრალი რეგიონში დაძაბულობის დაწყებისა და სამხრეთ ოსეთსა და აფხაზეთში საბრძოლო მოქმედებების დაწყვების გამო. აღნიშნული რეზოლუციები არსებული პრობლემების გადაწყვეტის ხასიათის მქონედ და ობიექტურად ვერ განიხილება",_ ნათქვამია აფხაზეთის ე.წ საგარეო საქმეთა სამინისტროს მიერ გავრცელებულ განცხადებაში.
სეპარატისტული აფხაზეთის ე.წ. საგარეო უწყება მიიჩნევს, რომ ეუთოს საპარლამენტო ასამბლეამ კიდევ ერთხელ თვალნათლივ დაანახა ყველას,რომ მას საქართველოსა და აფხაზეთს, საქართველოსა და ე.წ. სამხრეთ ოსეთს შორის არსებული პრობლემების გადაწყვეტისათვის კონსტრუქციული წინადადებები არ გააჩნია.

"აფხაზეთის საგარეო საქმეთა სამინისტრო ასევე მიიჩნევს, რომ მხოლოდ საბჭოთა პერიოდში არსებული საქართველოს ტერიტორიული მთლიანობის მხარდაჭერით, ეუთოს საპარლამენტო ასამბლეა ასევე მხარს უჭერს სტალინის მიერ 1931 წლის 19 თებერვალს მიღებულ გადაწყვეტილებას აფხაზეთის, როგორც ავტონომიური რესპუბლიკის საქართველოსთან მიერთების შესახებ", _ ნათქვამია მაქსიმ ღვინჯიას უწყების მიერ გავრცელებულ განცხადებაში და იქვე აღნიშნულია, რომ აფხაზეთის ტერიტორიაზე მონიტორინგის მისიის გაფართოების თხოვნით ასამბლეა რუსეთის ფედერაციის ხელისუფლებას მიმართავს და ამით "ხაზს უსვამს, რომ ამ პრობლემის უშუალოდ აფხაზეთის ხელისუფლებასთან განხილვას არ აპირებს. ეს კი მიუხედავად იმისა ხდება, რომ აფხაზეთის რესპუბლიკა დამოუკიდებელი, აღიარებული სახელმწიფოა",_ ნათქვამია განცხადებაში.

ამას გარდა, სეპარატისტული აფხაზეთის ე.წ. საგარეო უწყება ასევე აცხადებს, რომ "ევროკავშირის დამკვირვებლებს არ აქვთ იურიდიული საფუძველი იმისა, რომ იყვნენ აფხაზეთის ტერიტორიაზე. მონიტორინგის მისია საქართველოშია ბაზირებული და მას არავითარი პოზიტიური შედეგი არ მოუტანია უსაფრთხოების დაცვის თვალსაზრისით, მეტიც, იგი საქართველოს მილიტარიზაციაზე და კონფლიქტის ახალი ესკალაციისკენ მიმავალ მათ ქმედებებზე თვალის დახუჭვას აგრძელებს", _ ნათქვამია განცხადებაში.
სეპარატისტები ასევე უკმაყოფილონი არიან იმით, რომ ასამბლეა მოუწოდებს სეპარატისტულ აფხაზეთს დააბრუნოს ყველა ქართველი დევნილი აფხაზეთში.