სერბეთის დემოკრატიული გამარჯვება ნიშნავს სერბეთის ევროპული ინტეგრაციის დაჩქარებას, კორუფციის დაძლევას და კანონის უზენაესობის დამყარებას - ყველაფერ იმას, რასაც რუსეთი და მისი სატელიტი რეჟიმები ემტერებიან, - ამის შესახებ “ლელო-ძლიერი საქართველოს” საგარეო მდივანმა გრიგოლ გეგელიამ განაცხადა. ის სერბეთში ვუჩიჩის დამარცხებას გამოეხმაურა.
"მსურს სრულიად სერბ ერს მივულოცო ბრწყინვალე გამარჯვება ვუჩიჩის ავტოკრატიული რეჟიმის წინააღმდეგ. დღეიდან მსოფლიოში ერთით ნაკლები "ქოცი" იკავებს მმართველობის სადავეებს.
ბოლო დროს რუსეთი დამარცხდა უნგრეთში, მოლდოვაში, რუმინეთში, სომხეთში და ახლა უკვე სერბეთშიც, რომელიც საუკუნეების განმავლობაში იყო რუსეთის ყველაზე ტრადიციული და მჭიდრო მოკავშირე მთელს რეგიონში. სწორედ ასევე, რუსეთი დამარცხდება საქართველოშიც.
სერბეთის დემოკრატიული გამარჯვება ნიშნავს სერბეთის ევროპული ინტეგრაციის დაჩქარებას, კორუფციის დაძლევას და კანონის უზენაესობის დამყარებას - ყველაფერ იმას, რასაც რუსეთი და მისი სატელიტი რეჟიმები ემტერებიან.
ეს მხოლოდ სერბეთის გამარჯვება არ არის - ეს არის ყველა იმ ადამიანის გამარჯვება, რომელსაც სჯერა, რომ სახელმწიფო ეკუთვნის ხალხს და არა ერთ ადამიანს, ერთ პარტიას ან ძალაუფლების შენარჩუნებაზე ორიენტირებულ კორუმპირებულ სისტემას.
უნგრეთის შემდეგ სერბული გამარჯვებაც ადასტურებს, რომ პოლიტიკურ ბრძოლას ყოველთვის აქვს პრინციპული მნიშვნელობა ნებისმიერი რეჟიმის წინააღმდეგ.
სრული უთანასწორობის, ერთ პარტიაზე მორგებული სახელმწიფო აპარატის, წინასწარ გაყალბებული სისტემის, კოლოსალური ადმინისტრაციული რესურსის, პრივატიზებული კონსტიტუციის, კორუფციულად მიტაცებული ათობით მილიარდის და სრული მედია მონოპოლიის მიუხედავად, ჯერ უნგრელმა, დღეს კი სერბმა ხალხმა დაამტკიცა, რომ თავისუფლების სურვილს, მოქალაქეობრივ სიმამაცესა და სამართლიანობისთვის ბრძოლას შეუძლია შეცვალოს ქვეყნის პოლიტიკური მომავალი.
ვუჩიჩი დაამარცხა არა გაერთიანებულმა ოპოზიციამ, არამედ გაერთიანებულმა ერმა - სტუდენტებმა, პროფესორებმა, ხელოვანებმა, სპორტსმენებმა, ექიმებმა, პროფკავშირებმა, კულტურის დარგისა და საზოგადოების სახეებმა.
ეს არის ერისა და დემოკრატიის გამარჯვება ავტოკრატიის წინააღმდეგ და მაგალითი იმისა, რომ ხალხის ნებას ვერ აღუდგება ვერავითარი რეპრესია, ჩაგვრა თუ პარტიების აკრძალვა. სერბეთმა კიდევ ერთხელ დაადასტურა, რომ ფართო საზოგადოებრივი ნება არის გადამწყვეტი პოლიტიკური გამარჯვებისთვის. "ლელო" ყოველთვის მიესალმებოდა ფართო საზოგადოებრივ ერთობას რეჟიმის წინააღმდეგ ბრძოლაში და სერბეთმა კიდევ ერთხელ დაადასტურა, რომ ეს არის პოლიტიკური ბრძოლის სწორი, ეფექტური და წარმატებული მოდელი.
სერბეთის გამარჯვება იმედია საქართველოსთვისაც. ჩვენც გვჯერა, რომ სწორი ბრძოლის შედეგად დადგება დღე, როდესაც გაიმარჯვებს ქართველი ხალხის თავისუფალი ნება და ჩვენი ქვეყანა დაუბრუნდება ევროპულ მომავალს.
გაუმარჯოს თავისუფალ სერბეთს! გაუმარჯოს თავისუფალ საქართველოს! გაუმარჯოს ხალხის გამარჯვებას რეჟიმის წინააღმდეგ! Живела слободна Србија! - განაცხადა გრიგოლ გეგელიამ.
