ნარკოტიკული ნივთიერებების შემცველი პრეპარატების შემოტანის რამდენიმე მცდელობა აღკვეთეს 4-5 ივლისს შემოსავლების სამსახურის თანამშრომლებმა. მათ შორის, 4 ივლისს, სგპ „ვალეს“ კონტროლის ზონაში თურქეთის მხრიდან შემოსული კანადის მოქალაქე ე.ა.ჯ.-ის ხელბარგის ეჭვის საფუძველზე დათვალიერების შედეგად, მათ აღმოაჩინეს ნარკოტიკული საშუალების შემცველი პრეპარატი APO-TRAMADOL - 10 აბი, ხოლო 5 ივლისს, თურქეთის მოქალაქე ჰ.ი.-ის ხელბარგის დათვალიერების შედეგად - ნარკოტიკული საშუალების შემცველი პრეპარატი GERALGINE-k - 18 აბი.
ორივე საქმე შემდგომი რეაგირების მიზნით გადაეცა საპატრულო პოლიციის სამცხე-ჯავახეთის მთავარი სამმართველოს საგამოძიებო სამსახურს.
ასევე ნარკოტიკული ნივთიერების შემცველი პრეპარატი „ტრამადოლი“ (20 აბი) აღმოაჩნდა 5 ივლისს, სგპ “ყაზბეგის“ ტერიტორიაზე, სომხეთის მოქალაქე ს.ს.-ს. მებაჟე ოფიცრებმა პრეპარატი მგზავრის ხელბარგის სკანერით დათვალიერების შედეგად აღმოაჩინეს.
საქმე შემდგომი რეაგირების მიზნით გადაეცა შსს საპატრულო პოლიციის დეპარტამენტის მცხეთა-მთიანეთის მთავარ სამართველოს.
