ადამიანის უფლებათა დაცვის მხრივ მსოფლიოში არსებულ ვითარებაზე ამერიკის სახელმწიფო დეპარტამენტი სპეციალურ ანგარიშს აქვეყნებს. დოკუმენტში, რომელიც ჟურნალისტებს სახელმწიფო მდივანმა ჯონ ქერიმ წარუდგინა, საქართველოზეც არის საუბარი. ანგარიშში ნახსენებია ყოფილი შინაგან საქმეთა მინისტრის საკნიდან გაყვანის ფაქტი, კაბელებისა და ირაკლი ალასანიას გათავისუფლების საქმე, ასევე, ბაჩანა ახალაიასა და მიხეილ სააკაშვილისთვის წაყენებული ბრალი, ფარული მოსმენებისა და პოლიტიკური პატიმრების თემა. “ზოგიერთმა ოპოზიციურმა პარტიამ ხელისუფლების მიერ დაწყებულ გამოძიებას ყოფილი მაღალჩინოსნების მიმართ პოლიტიკურად მოტივირებული უწოდა. 2012 წლის დეკემბრიდან ხელისუფლებამ ბრალი 45 საშუალო და მაღალი რანგის პირს წაუყენა, მათ შორის, ექსპრეზიდენტ მიხეილ სააკაშვილს, ნაციონალური მოძრაობის მდივანს ვანო მერაბიშვილსა და ყოფილ თავდაცვის, შინაგან საქმეთა და სასჯელთაღსრულების მინისტრს, ბაჩანა ახალაიას,”-ნათქვამია დოკუმენტში. სახელმწიფო დეპარტამენტის ანგარიშში ასევე მოხსენიებულია ქობულეთის მუსლიმანურ სალოცავზე ღორის თავის დაკიდების ფაქტი და მაღალჩინოსნების მიერ გაკეთებული ჰომოჰობიური განცხადებები. სახელმწიფო დეპარტამენტის დასკვნით, საქართველოში კვლავ აქტუალურ პრობლემას წარმოადგენს ქალთა მიმართ ძალადობაც. ქერის უწყება დადებით ტენდენციად განიხილავს პატიმართა სიკვდილიანობის შემცირებას და აღმკვეთი ღონისძიებების გირაოთი შეცვლის პრაქტიკის გახშირებას.
