ამ წუთებში სპეციალური ჯგუფები მტაცებელს კუს ტბის მიმდებარე ტერიტორიაზე ეძებენ. სპეციალურმა ჯგუფებმა მონადირეებთან და ძაღლებთან ერთად უკვე შეამოწმეს ეთნოგრაფიული მუზეუმის ტერიტორია. მიმდებარე ტერიტორიაზე დამონტაჟებულია ფოტომახეები და დაყრილია ლეში.
როგორც კრიზისების მართვის საბჭოში აცხადებენ გუშინდელი ღამის შემდეგ 112-ში 50-მდე ზარი შევიდა, მათზე რეაგირების მიუხედავად, არცერთ შემთხვევაში არც მტაცებელი და არც ნაკვალევი არ იქნა აღმოჩენილი.
კრიზისების მართვის საბჭო მოსახლეობას სიფრთხილისკენ მოუწოდებს. განცხადება რამდენიმე წუთის წინ ამის შესახებ კრიზისების მართვის საბჭოს ხელმძღვანელის მოადგილემ გიორგი ღიბრაძემ გააკეთა.
შეგახსენებთ, რომ სამმა მოქალაქემ მონადირეებს და სპეციალურ სამსახურებს მიაწოდა ფოტომასალა, სადაც მტაცებელია აღბეჭდილი. სპეციალისტები დარწმუნდნენ, რომ ფოტოები, დაახლოებით, ერთსა და იმავე ადგილასაა გადაღებული.
