სტამბოლის მერიის წარმომადგენლები, მთავრობას რისკებისა და კრიზისების მართვის კუთხით, საკუთარ გამოცდილებას გაუზიარებენ.
თბილისში სტიქიის შედეგების გასაცნობად სტამბოლის მერიის წარმომადგენლები ისმაილ ჰაქი თურუნჩი და მეჰმეთ დემირი ჩამოვიდნენ. დედაქალაქის მერმა დავით ნარმანიამ თურქეთის რესპუბლიკის საგანგებო და სრულუფლებიანი ელჩსა და სტამბოლის მერიის წარმომადგენლებს სტიქიით დაზარალებული ადგილები დაათვალიერებინა და არსებული ვითარებისა და საჭიროებების შესახებ ინფორმაცია მიაწოდა.
სტამბოლის მერიის წარმომადგენლები, ინფორმაციის მიღების გარდა, ადგილობრივ მთავრობას რისკებისა და კრიზისების მართვის კუთხით საკუთარ გამოცდილებას გაუზიარებენ.
„მერიის სპეციალური წარმომადგენლები ჩამოვიდნენ, რათა დაგვეხმარონ იმ საშუალებებით, რაც საჭირო იქნება ამ ადგილების გაწმენდასა და დასუფთავებაში. გარდა ამისა, თურქი ბიზნესმენები, მათი ასოციაციის მეშვეობით, აქტიურად არიან ჩართულები ჩვენი დახმარების საქმეში“, - განაცხადა დავით ნარმანიამ.
