რუსმა ბლოგერებმა ГРУ-ს იმ სამი სპეცრაზმელის ვინაობა დაადგინეს, რომელთა საფლავებსაც მათ რუსეთში მიაკვლიეს.
ესენია: ანტონ საველიევი, ივან კარდაპოვი და თემურ მამაიუსუფოვი.
როგორც უკრაინული სააგენტო ,,TCH” იუწყება, სამივე დაღუპული რუსეთის თავდაცვის სამინისტროს ГРУ-ს სპეცდანიშნულების ტამბოვში დისლოცირებულ მე-16 ბრიგადაში ირიცხებოდა.
ისინი აღმოსავლეთ უკრაინაში, სავარაუდოდ 5 მაისს, შიროკინოსთან ან ზალატოი პაპასნიანსკის რაიონში დაიღუპნენ, სადაც იმ დროისთვის აქტიური საბრძოლო მოქმედებები მიმდინარეობდა.
მათ დაღუპვას სოციალურ ქსელებში სპეცრაზმელთა თანამებრძოლები და დედები ახმაურებენ.
ერთ-ერთი მათგანის, ანტონ საველიევის დედას რუსი ჟურნალისტი დაუკავშირდა და დეტალების დაზუსტება სცადა, მაგრამ ჯარისკაცის მშობელმა განაცხადა, რომ მისთვის სულ ერთია, სად დაიღუპა მისი შვილი.
საველიევის დედისგან განსხვავებით, თემურ მამაიუსუფოვის ძმა უფრო ენაწყლიანი გამოდგა, თუმცა ჟურნალისტებმა მას თავიანთი ვიანობა დაუმალეს და თავი ,,აპალჩენცებად” გააცნეს.
მან რუსი სპეცრაზმელების უკრაინის ბრძოლებში დაღუპვის ფაქტი დაადასტურა და თქვა, რომ ,,საბრძოლო დავალების შესრულებისას” მისი ძმის დაღუპვის შესახებ ოჯახს სწორედ მისმა მეთაურმა აცნობა.
აქტივისტები, რომლებმაც დაღუპული ჯარისკაცების საფლავები აღმოაჩინეს, ამტკიცებენ, რომ რუსეთის არმიის მეთაურები დაღუპულთა მშობლებსა და ახლობლებს აფრთხილებენ, ,,ენას კბილი დააჭირონ” და არვისთან არაფერი თქვან.
შეგახსენებთ, რომ აღმოსავლეთ უკრაინაში მიმდინარე საომარ კონფლიქტში მონაწილეობის ფაქტს რუსული მხარე მტკიცედ უარყოფს.
