საქართველოს პრემიერი-მინისტრის ირაკლი ღარიბაშვილის განცხადებით, ევროკომისიის მიერ გამოქვეყნებული ვიზალიბერალიზაციის შეფასების ანგარიში უაღრესად პოზიტიურია. ამის შესახებ ირაკლი ღარიბაშვილმა პარლამენტში, რიგგარეშე სესიაზე განაცხადა.
"მინდა ყველას მოგილოცოთ ის წარმატება, რისი მოწმეც დღეს დილით გახდა საქართველო. გამოქვეყნდა ვიზალიბერალიზაციის შეფასების ანგარიში, რომელიც არის უაღრესად პოზიტიური და მე გილოცავთ ყველას. ამ ანგარიშში არის რეალურად აღიარებული ის, რასაც ჩვენ მოველოდით. მასშტაბური რეფორმები, ეს არის პროგრესი, რისთვისაც ჩვენ ბოლო 6 თვე რეკორდულად მოკლე დროში ვიმუშავეთ", - განაცხადა ღარიბაშვილმა და დეპუტატებს მოუწოდა ამ ანგარიშს გაეცნონ.
ევროკომისიამ დღეს გამოაქვეყნა თავისი მესამე, მიმდინარე ანგარიში საქართველოს მიერ სავიზო რეჟიმის ლიბერალიზაციის სამოქმედო გეგმის განხორციელების თაობაზე. შემდეგი ანგარიში მიმდინარე წლის ბოლოს გამოქვეყნდება.
