საქართველოში ევროკავშირის ელჩის იანოშ ჰერმანის განცხადებით, სავიზო რეჟიმის შესახებ გადაწყვეტილებას ევროსაბჭოს ყველა წევრი ქვეყნის მიერ იქნება მიღებული. დღეს გამართულ პრესკონფერენციაზე ელჩმა განაცხადა, რომ სავიზო რეჟიმის შესახებ საკითხი, ევროკავშირის საბჭოსა და 28-ვე წევრი სახელმწიფოს მიერ მისაღები გადაწყვეტილებაა.
"თქვენს წინაშეა წარმოდგენილი ევროკომისიის ანგარიში. ეს არის ტექნიკურ შეფასებებზე დაფუძნებული ანგარიში. თუ ყველაფერი სათანადოდ წარიმართება და საქართველო განაგრძობს აქტიურად მუშაობას ამ მიმართულებით, შემდეგ, უახლოეს პერიოდში ევროკომისია გააკეთებს დასკვნას იმის თაობაზე, რომ საქართველომ შეასრულა ყველა საჭირო წინაპირობა. სწორედ ამიტომაც აღვნიშნეთ, რომ შემდგომი ანგარიში ევროკომისის ამ წლის ბოლომდე იქნება გამოქვეყნებული. თუ შემდგომი ანგარიში დაასკვნის, რომ საქართველომ შეასრულა თავისი სამიზნე ამოცანა, შემდეგ ევროკომისია გააკეთებს რეკომენდაციას ევროკავშირის საბჭოსთვის, რომ მათ მიიღონ სათანადო გადაწყვეტილება სავიზო რეჟიმის თაობაზე. ტექნიკური ნაწილი ამ საკითხის ფასდება ევროკომისიის მიერ, ხოლო პოლიტიკური გადაწყვეტილება მისაღებია ევროკავშირის საბჭოსა და 28-ვე წევრი სახელმწიფოს მიერ", - განმარტა ჰერმანმა.
საქართველოში ევროკავშირის ელჩი საქართველოს პრეზიდენტის, პრემიერისა და პარლამენტის თავმჯდომარის მიერ გაგზავნილ მიმართვასაც გამოეხმაურა და თქვა, რომ საქართველოს ლიდერების მოსაზრებებს ევროკავშირის ყურადღებით ეკიდება.
