პრემიერ-მინისტრ ირაკლი ღარიბაშვილის განცხადებით, მთავრობა ყველაფერს გააკეთებს დევნილებსთვის ცხოვრების ადამიანური პირობების შესაქმნელად.
,,მინდა გითხრათ, რომ დღეისათვის საცხოვრებლით უზრუნველყოფილია 29 ათას 479 დევნილი ოჯახი. 3 ათას 640 ოჯახს, რომლებიც 20 წლის განმავლობაში სახელმწიფო საკუთრებაში არსებულ ფართობზე ცხოვრობდნენ, ეს ბინები საკუთრებაში სიმბოლურ ფასად - 1 ლარად გადავეცით და ახლა მათ საკუთარი ჭერი აქვთ, რაც ძალიან მნიშვნელოვანია თითოეული დევნილისთვის. გარდა ამისა, ჩვენ 500 ოჯახისათვის კერძო მესაკუთრეებისგან საცხოვრებელი ფართობი გამოვისყიდეთ. ასევე, „სოფლად სახლის“ პროექტის ფარგლებში 400-მდე ოჯახს თანხმობა ეთქვა სახლის შესყიდვაზე. დევნილებისათვის ახალი საცხოვრებელი ბინების მშენებლობები და რეაბილიტაცია მთელი ქვეყნის მასშტაბით მიმდინარეობს. სულ 4 ათას 944 ბინას ვაშენებთ, ხოლო რეაბილიტაცია 826 ბინას ჩაუტარდება. კიდევ ერთი ძალიან მნიშვნელოვანი გადაწყვეტილების შესახებ მოგახსენებთ. პირველად საქართველოში ჩვენ „ჰუალინგ ჯგუფისგან“ 600 ოჯახისთვის 9 კორპუსი შევისყიდეთ და კიდევ 7 კორპუსის შეძენას ვგეგმავთ. ქართველი მენაშენეებისგან 300-მდე ბინა შევისყიდეთ; სოციალური პაკეტის ფარგლებში 46 ათას 500 დევნილ ოჯახს 15 მილიონი ლარის დახმარება გაეწია“, - განაცხადა პრემიერმა.
მისივე თქმით, 1 სექტემბრამდე 10 ათას დევნილ ოჯახს საცხოვრებელი ფართობი დაუკანონდება, 130-მდე ეკომიგრანტ ოჯახს საცხოვრებელი ფართობი გადაეცემა, 1200 ეკომიგრანტს საცხოვრებელი სახლი დაუკანონდება, ხოლო წლის ბოლომდე „სოფლად სახლის“ პროექტის ფარგლებში დევნილ ოჯახებს 200 სახლი გადაეცემა.
„ქართველი მენაშენეებისაგან 600 ბინას გამოვისყიდით. ჩვენ საპილოტე პროექტს ვახორციელებთ, რომელიც, დარწმუნებული ვარ, ძალიან დიდ შვებას მისცემს დევნილ ოჯახებს, რომლებმაც სახლი იპოთეკური სესხით შეიძენეს. ჩვენ მათ, კრიტერიუმების შესაბამისად, ფინანსურ დახმარებას გავუწევთ. ეს გახლავთ ერთმილიონიანი პროექტი“, - აღნიშნა ღარიბაშვილმა.
