ევროკომისიის მიმდინარე ანგარიში, საქართველოს მიერ სავიზო რეჟიმის ლიბერალიზაციის სამოქმედო გეგმის განხორციელების თაობაზე, მოიცავს ძალიან დადებით შეფასებას ევროკომისიის მხრიდან. ამის შესახებ, საქართველოში ევროკავშირის ელჩმა იანოშ ჰერმანმა, დღეს გამართულ პრესკონფერენციაზე განაცხადა. მისი ინფორმაციით, ევროკომისიამ დღეს თავისი მესამე, მიმდინარე ანგარიში გამოაქვეყნა.
ელჩის განცხადებით, ევროკომისია მიიჩნევს, რომ საქართველომ დაიცვა ის სამიზნე ამოცანები, რომელიც განსაზღვრული იყო სამოქმედო გეგმის მეორე ეტაპისთვის.
,,ევროკომისია მიიჩნევს, რომ ის საკანონმდებლო და სტრატეგიული ჩარჩო, ის ინსტიტუციონალური და საორგანიზაციო პრაქტიკები, რომელიც ჩამოაყალიბა საქართველომ ოთხი ძირითადი ბლოკის მიმართულებით, ძირითადად შეესაბამება ევროპულ და საერთაშორისო სტანდარტებს და ზოგჯერ საუკეთესო საერთაშორისო სტანდარტებსაც კი’, - განაცხადა ჰერმანმა. მისივე თქმით, საქართველო ძალიან ახლოს არის სავიზო რეჟიმის
ლიბერალიზაციის სამოქმედო გეგმის ძირითადი სამიზნე ამოცანების განხორციელებასთან, უსაფრთხო და მაქსიმალურად ეფექტური ფორმით.
ელჩის განცხადებით, ამჟამად საქართველომ უნდა მოაგვაროს დარჩენილი რეკომენდაციების განხორციელების საკითხი მომავალი შეფასების ჩატარებამდე, რომელიც იქნება წლის ბოლოსკენ.
,,მოგეხსენებათ, ევროკომისიის მიერ სავიზო ლიბერალიზაციის პროცესის შეფასება ტექნიკური პროცესია და აქედან გამომდინარე, რამდენიმე ძირითად საკითხზე გავამახვილებ ყურადღებას. ევროკომისიის შეფასებით, სამიზნე ამოცანები სრულად შესრულდა ექვსი მიმართულებით. ესენია: დოკუმენტების უსაფრთხოება, ინტეგრირებული საზღვრის მართვა, ორგანიზებული დანაშაულის პრევენცია და მასთან ბრძოლა, იურიდიული თანამშრომლობა სისხლის სამართლის საკითხებზე, მონაცემების დაცვა, გადაადგილების თავისუფლება და ასევე პირობები და პროცედურები, რომლებიც აუცილებელია სამგზავრო და იდენტიფიცირების დოკუმენტების უზრუნველსაყოფად. ეს არის ის რეკომენდაციები, რომლებიც სრულად შესრულდა. არის ასევე ის სამიზნე ამოცანები, რომლებიც თითქმის სრულად არის შესრულებული. ეს არის მინიმალური რაოდენობის და არის ოთხი მიმართულება. სადაც სამიზნე ამოცანები თითქმის შესრულებულია. ესენი არის მიგრაციის მენეჯმენტი, ფულის გათეთრება, თანამშრომლობა სამართალდამცავ ორგანოებს შორის და მოქალაქეების უფლებები",- განაცხადა იანოშ ჰერმანმა.
ელჩის განცხადებით, არის დასასრულებელი რეკომენდაციებიც, ესენია თავშესაფრის მაძიებლების საკითხი, ანტიკორუფციული ღონისძიებები, ნარკობიზნესთან ბრძოლა და ტრეფიკინგის წინააღმდეგ ბრძოლა.
ელჩმა აღნიშნა ასევე, რომ გასული თვეების განმავლობაში საქართველოს მიერ გაწეული მნიშვნელოვანი წინსვლის გათვალისწინებით, ევროკომისია მზადაა, გადმოსწიოს შემდგომი ანგარიშის ვადები, თუკი გაგრძელდება სწრაფი წინსვლა იმ ნიშნულებისა და მდგომარეობის გათვალისწინებით, რომელიც წინამდებარე ანგარიშში და სამუშაო დოკუმენტშია აღწერილი.
