საქართველოში ევროკავშირის ელჩის იანოშ ჰერმანის განცხადებით, როდესაც ქვეყნის ლიდერები მიმართავენ ევროკავშირს, მათ მოსაზრებებს ყურადღებით ეკიდებიან. როგორც მან დღეს გამართულ პრესკონფერენციაზე განაცხადა, მან იცის თუ რა მნიშვნელოვანი საკითხებია წამოჭრილი პრეზიდენტის, პრემიერისა და პარლამენტის თავმჯდომარის ერთობლივ წერილში.
,,როდესაც ამ ქვეყნის ლიდერები მიმართავენ ევროკავშირის ლიდერებს, ჩვენ დიდი ყურადღებით ვეკიდებით მათ მოსაზრებებს. გამომდინარე იქედან, რომ ეს მიმართვა ეხება ევროკავშირის ლიდერებს, ეს მათი გადასაწყვეტია. მე მათ მაგივრად შეფასებებს ვერ გავაკეთებ, მაგრამ რა თქმა უნდა, მე ვიცი ის საკითხები, რომელიც წამოჭრილია ამ წერილში, მნიშვნელოვანი საკითხებია", - აღნიშნა ელჩმა.
მისივე თქმით, გაგრძელდება ასოცირების ხელშეკრულებაზე თანამშრომლობა ორმხრივ ფორმატში.
,,მე დარწმუნებული ვარ, ჩვენ გავაგრძელებთ მის განხორციელებას კარგი ტემპით. კიდევ ერთხელ აღვნიშნავ, მე არ ვარ ის პირი, რომელსაც შეუძლია ამ წერილზე პასუხის გაცემა, უბრალოდ, ზოგადად შევაფასებ იმ კონტექსტს, რომელშიც იქნება გადაწყვეტილება მიღებული", - აღნიშნა იანოშ ჰერმანმა.
საქართველოს პრეზიდენტმა, პრემიერ-მინისტრმა და პარლამენტის თავმჯდომარემ რიგის სამიტის წინ ევროკომისიის პრეზიდენტს ჟან-კლოდ იუნკერს, ევროკავშირის საბჭოს პრეზიდენტს დონალდ ტუსკს და ევროპარლამენტის პრეზიდენტს მარტინ შულცს ერთობლივი წერილით მიმართეს და რიგის სამიტზე საქართველოს მიერ მიღწეული პროგრესის ასახვა სთხოვეს.
სამიტის გამართვამდე კი უცხოურ პრესაში გავრცელდა ინფორმაცია სამიტის დეკლარაციის პროქტის შესახებ, რომელშიც საქართველოს მიერ ვიზალიბერალიზაციის მიღებაზე საუბარი არ არის და საქართველოს, მოლდოვასა და უკრაინას არც ევროპული პერსპექტივის აღიარებას სთავაზობს.
