საქართველოს პრეზიდენტი გიორგი მარგველაშვილი 10 მაისს, ბრიუსელში, ოფიციალური ვიზიტით გაემგზავრება და მაღალი რანგის შეხვედრებს გამართავს. ვიზიტის ფარგლებში დაგეგმილია შეხვედრები ევროკავშირის პრეზიდენტთან დონალდ ტუსკთან, ევროკავშირის უმაღლეს წარმომადგენელთან ფედერიკა მოგერინსა და ევროკომისართან ევროკავშირის სამეზობლო პოლიტიკისა და გაფართოების საკითხებში იოჰანეს ჰანსთან.
ასევე, ვიზიტის ფარგლებში დაგეგმილია საქართველოს პრეზიდენტის შეხვედრა ევროპარლამენტის პოლიტიკური პარტიების ლიდერებთან. ასევე, ევროკომისართან ენერგეტიკის საკითხებში და ევროპის სავაჭრო-სამრეწველო პალატების გაერთიანების პრეზიდენტთან.
გიორგი მარგველაშვილი ვიზიტის ფარგლებში მონაწილეობას მიიღებს აღმოსავლეთ პარტნიორობის კონფერენციაში. ასევე, სიტყვით გამოვა ევროპარლამენტის საგარეო საქმეთა კომიტეტში და პრესკონფერენციაზე მედიის შეკითხვებს უპასუხებს.
ამასთან, პრეზიდენტი ვიზიტის ფარგლებში ნატო-ს გენერალურ მდივანს იენს სტოლტენბერგს შეხვდება. დაგეგმილია სახელმწიფო მეთაურის აუდიენცია მის სამეფო უდიდებულესობასთან, ბელგიის მეფე ფილიპთან.
როგორც საგარეო ურთიერთობათა საკითხებში პრეზიდენტის მრჩეველი თენგიზ ფხალაძე აცხადებს, ვიზიტის ფარგლებში ძირითადი აქცენტები ევროკავშირის მიმართულებით იქნება გადატანილი.
„პრეზიდენტი შეხვედრებს გამართავს ევროკავშირის ყველა მაღალი რანგის პირთან. ძირითადი თემა რიგის სამიტი იქნება. ის მოლოდინები, რომელიც საქართველოს აქვს. ასევე, ის პროგრესი და რეფორმები, რომელიც საქართველომ გაატარა. ვიზიტი საქართველოს ევროპული და დასავლური ინტეგრაციის ხელშემწყობი იქნება და ძალიან დიდი იმედი გვაქვს, რომ ეს ვიზიტი წარმატებული იქნება“, - განაცხადა ფხალაძემ.
პრეზიდენტი ბრიუსელში ვიზიტს 11 მაისს დაასრულებს.
