ჯანდაცვის მინისტრმა დავით სერგეენკომ შუახევში მომხდარი უბედური შემთხვევის მიზეზები კიდევ ერთხელ განმარტა და აღნიშნა, რომ დაჭრილი იმ კლინიკაში დაიღუპა, რომელიც ნაცონალურმა მოძრაობამ ნულოვანი ვალდებულებებით დაარიგა.
„2010 წელს თითო ლარად რომ ჩამოარიგეთ კლინიკები ნულოვანი ვალდებულებებით, ამ მმართველმა კომპანიამ ამით ისარგებლა. საავადმყოფოში რომ მიიყვანენ ადამიანს, რეანიმობილით კი არ უნდა გადაიყვანონ ბათუმში, არამედ იქ, ადგილზე უნდა მოახდინონ მისი უზრუნველყოფა. დაჭრილების მკურნალობა რეანიმობილში არ ხდება. ერთადერთი გამონაკლისი მაშინ საჩხერის საავადმყოფო იყო, რომელიც არ დაგითმეთ და ახლა 19 რაიონული საავადმყოფო დავაბრუნეთ, რათა იგივე დღეში არ აღმოვჩენილიყავით. ყველაფერს საზღვარი აქვს ბატონებო და ქალბატონებო“, - მიმართა დავით სერგეენკომ საპარლამენტო უმცირესობის წარმომადგენლებს.
ჯანდაცვის მინისტრის აღნიშნულ განცხადებას საპარლამენტო უმცირესობის წევრმა ირმა ნადირაშვილმა რეპლიკით უპასუხა და მინისტრს ურჩია, მომხდარის მიზეზები გარდაცვლილის ოჯახს აუხსნას.
„ოჯახს ელაპარაკეთ და აუხსენით, რომ თურმე ეს ყველაფერი ჩვენი ბრალი ყოფილა“, - მიმართა ირმა ნადირაშვილმა დავით სერგეენკოს.
შეგახსენებთ, შუახევში, კორპორაცია „ევექსის“ კლინიკაში 3 მაისს, ცივი იარაღით დაჭრილი ახალგაზრდა მამაკაცი მოათავსეს. მამაკაცი საავადმყოფოში მიყვანის შემდეგ გარდაიცვალა.
