პარლამენტის თავმჯდომარე დავით უსფაშვილი რეზო ჩხეიძის ოჯახს უსამძიმრებს და აცხადებს, რომ იგი იყო ქართული კინემატოგრაფიის ერთ-ერთი საუკეთესო წარმომადგენელი.
,,რეზო ჩხეიძე იყო ქართული კინემატოგრაფიის ერთ-ერთი საუკეთესო წარმომადგენელი, შემოქმედი, რომელიც მხატვრული სიზუსტით გადმოგვცემდა თავისი ეპოქის სულისკვეთებას. დანამდვილებით შეიძლება ითქვას, რომ რეზო ჩხეიძის შემოქმედება ქცეულია ქართული კინოს კლასიკად და მისი გარდაცვალება, დიდი დანაკლისია ქართული საზოგადოებისთვის. ვუსამძიმრებ ბატონი რეზოს ოჯახს, ახლობლებს და მთელს საქართველოს”, _აცხადებს უსუფაშვილი.
რეჟისორი ცნობილი ქართველი მწერლის დავით ჩხეიძის ვაჟი იყო. ის 1926 წლის 8 დეკემბერს დაიბადა. 1943-46 წლებში რეზო ჩხეიძე რუსთაველის სახელობის სახელმწიფო ინსტიტუტში სარეჟისორო ფაკულტეტზე სწავლობდა. მის სახელს უკავშირდება კინონარკვევები: „ჩვენი სასახლე,“ „ქართული ხალხური ცეკვის სახელმწიფო ანსამბლი,“ ასევე ფილმები: „მაგდანას ლურჯა,“ „ჩვენი ეზო,“ „განძი,“„ღიმილის ბიჭები,“ “ნერგები,“ "ჯარისკაცის მამა," „მშობლიურო ჩემო მიწავ“ და ა.შ.
რეზო ჩხეიძე დაჯილდოებულია არაერთი მედლითა და სხვადასხვა სახის ჯილდოთი. 1963-1981 წლებში ის საქართველოს კინემატოგრაფისტთა კავშირის მდივანი იყო. 1974 წლიდან რუსთაველის სახელობის თეატრალური ინსტიტუტის პედაგოგად მუშაობდა.
ბოლო წლებში ჩხეიძე კინოსტუდია „ქართული ფილმის“ დირექტორი იყო. მისი ვარსკვლავი რუთაველის თეატრის წინ რამდენიმე წლის წინ გახსნეს.
