,,თავისუფალი დემოკრატების” წევრის ნინო გოგუაძის განმარტებით, ე.წ. კაბელების საქმეზე დაკავებული თავდაცვის სამინიტროს თანამშრომლები უკანონო პატიმრები არიან და ისინი დააპატიმრეს იმისთვის, რომ გასულიყვნენ თავდაცვის ყოფილ მინისტრზე ირაკლი ალასანიაზე.
"ჩვენ არასდროს გვეპარებოდა ეჭვი, რომ ეს საქმე არის პოლიტიკურად მოტივირებული, რომ პროკურატურა გამოყენებულია პოლიტიკურ იარაღად და ეს უდანაშაულო ადამიანები მძევლებად ყავთ აყვანილი, რომ გასულიყვნენ ირაკლი ალასანიაზე," - განაცხადა საქალაქო სასამართლოში გოგუაძემ.
საქალაქო სასამართლოში ე.წ. კაბელების საქმეზე დაკავებული თავდაცვის სამინისტროს ყოფილი თანამშრომლების პროცესი მიმდინარეობს.
მოსამართლემ დაცვისა და ბრალდების შუამდგომლობები უნდა განიხილოს.
გამოძიების ინფორმაციით, 2013 წელს, თავდაცვის სამინისტროს მიერ ორგანიზებული საიდუმლო სახელმწიფო შესყიდვის მიმდინარეობისას, უპირატესობის „სილქნეტის" მიენიჭა. პროკურატურის განცხადებით, ხელშეკრულებით თავდაცვის სამინისტრომ სს „სილქნეტს" უნდა გადაუხადოს ჯამში 6 720 877.42 ლარი, საიდანაც წინასწარ (ავანსად) გადარიცხულია უკვე 6 480 877.42 ლარი, სანაცვლოდ კი თავდაცვის სამინისტრომ სს „სილქნეტისგან" 2015 წლის 16 იანვარს უნდა მიიღოს ქონება და მომსახურება, რომლის რეალური საბაზრო ღირებულება ექსპერტიზის დასკვნის შესაბამისად შეადგენს მხოლოდ 2 618 004.82 ლარს.