აფხაზეთი სუვერენული სახელმწიფოა და საქართველოს არ აქვს უფლება განახორციელოს სუვერენული უფლებები და იურისდიქცია აფხაზეთის რესპუბლიკის ტერიტორიაზე _ განაცხადა დღეს მოსკოვში გამართულ ბრიფინგზე რუსეთის საგარეო საქმეთა სამინისტროს ოფიციალურმა წარმომადგენელმა ანდრეი ნესტერენკომ.
მისივე თქმით, რუსეთმა და რიგმა სხვა სახელმწიფოებმა აღიარეს აფხაზეთი როგორც დამოუკიდებელი სახელმწიფო. "ამასთან დაკავშირებით რუსული მხარე გამომდინარეობს იმისგან, რომ საქართველოს არ აქვს უფლება განახორციელოს თავისი სუვერენული უფლებები და იურისდიქცია აფხაზეთის ტერიტორიის მიმართებაში _ ამაში კი შედის მისი წყლები, ტერიტორიალური ზღვა, ეკონომიკური ზონა და კონტინენტალური შელფი და ეს მოქმედებს მიუხედავად იმისა, რომ აფხაზეთსა და საქართველოს შორის შესაბამისი საზღვაო სივრცის გადანაწილება ჯერ არ მომხდარა", _ განაცხადა ნესტერენკომ.
მისივე თქმით, "რუსეთის საგარეო საქმეთა სამინისტრო იმედოვნებს, რომ საქართველო თავს შეიკავებს ნებისმიერი მცდელობებისგან, რომელიც დაარღვევს აფხაზეთის რესპუბლიკის სუვერენიტეტს შიდა ტერიტორიულ წყლებთან მიმართებაში, ეკონომიკური ზონისა და კონტინენტალურ შელფთან მიმართებაში. ასევე თავს შეიკავებს აღნიშნულ რეგიონში საერთაშორისო ნაოსნობის თავისუფლებისა და უსაფრთხოების ხელყოფისაგან, რაც შეიძლება საფრთხეს უქმნიდეს გემის ეკიპაჟსა და მგზავრების სიცოცხლის უსაფრთხოებას", _ განაცხადა ნესტერენკომ.
