თბილისის მუნიციპალიტეტის საკრებულოს თავმჯდომარე გიორგი ალიბეგაშვილი, თავმჯდომარის პირველი მოადგილე გიორგი ტყემალაძე და საერთაშორისო ურთიერთობების კომისიის თავმჯდომარე ლევან დარახველიძე დღეს ჩეხეთის დელეგაციას შეხვდნენ და სამომავლო თანამშრომლობის სფეროები განიხილეს.
ჩეხეთის დელეგაციამ ქვეყნის სოფლის მეურნეობის მინისტრის მრჩევლის იარომირ სკოლოუდუკის ხელმძღვანელობითა და კომპანიების ,,Axin spol.s.r.o.'',- მფლობელის როლანდ სანდტერისა და ,,Sandtner''-ის წარმომადგენლის ვლასტიმირ ჩუდიჩეკის შემადგენლობით დეპუტატებს წინადადებები შესაძლო თანამშრომლობის ისეთ სფეროებთან დაკავშირებით წარმოუდგინეს, როგორიცაა: ქალაქის გენ-გეგმა, იძულებით გადაადგილებულ პირთათვის თავშესაფრის მშენებლობა, ძველი ტიპის შენობების რეაბილიტაცია, ნარჩენების გადამუშავება, ასევე წყლისდასუფთავება, ქალაქის გამწვანება, მზის ენერგიის მკვებავების მოწყობილობები და თანამედროვე ტექნოლოგიები და სხვა მნიშვნელოვანი სფეროები.
თბილისის საკრებულოს თავმჯდომარის გიორგი ალიბეგაშვილის თქმით, აღნიშნული პროექტების განხორციელება დედაქალაქის განვითარებისთვის უმნიშვნელოვანესია და ამ კუთხით ჩეხეთის გამოცდილების გაზიარება ძალიან სასარგებლოა. მისივე ინფორმაციით, ეს იყო მუშა შეხვედრა, რომელიც მომავალში უფრო ინტენსიურ ფაზაში გადავა.
დედაქალაქის მუნიციპალიტეტის საკრებულოს ჩეხური მხარის ამ კონკრეტულ ჯგუფთან გრძელვადიანი თანამშრომლობა და ურთიერთგაგების ხელმოწერილი მემორანდუმი უკვე ერთი წელია აკავშირებთ.
