პრეზიდენტის სარეზერვო ფონდის დაფინანსებით და ხელშეწყობით განხორციელებული პროექტის „მოსამართლეთა სემინარები სასამართლოს დამოუკიდებლობის, გამჭვირვალობისა და მიუკერძოებლობის უზრუნველსაყოფად" ფარგლებში ასოციაცია „საქართველოს მოსამართლეთა ერთობის" ორგანიზებით სასამართლო დამოუკიდებლობისა და სამოსამართლო ეთიკის აქტუალურ საკითხებზე საერთაშორისო კონფერენცია გაიმართა. როგორც ,,ჯი-ეიჩ-ენს" პრეზიდენტის ადმინისტრაციიდან აცნობეს კონფერენციაზე საქართველოს პრეზიდენტის სარეზერვო ფონდის მიერ დაფინანსებული პროექტების პრეზენტაციაც მოეწყო. აღნიშნული პროექტები იყო „მოსამართლეთა სემინარები სასამართლოს დამოუკიდებლობის, გამჭვირვალობისა და მიუკერძოებლობის უზრუნველსაყოფად", „მართლმსაჯულების გაძლიერება" და „იუსტიციის უმაღლესი სკოლის შესაძლებლობების გაძლიერება".
ამ პროექტების ფარგლებში უკვე განხორციელდა სტუდენტური კონფერენციები და ტრენინგი ჟურნალისტებისთვის, მოეწყო ოლიმპიადა, რეგიონებში მცხოვრები ბავშვები ეწვივნენ მართლმსაჯულების მუზეუმს, შემუშავდა მოსამართლეთა სოციალური დაცვის გარანტიები. ამას გარდა, 44 მოსამართლისათვის გაიმართა სემინარები ავსტრიაში, გერმანიაში, სლოვაკეთსა და ლიტვაში. იუსტიციის უმაღლესი სკოლის შესაძლებლობების გაძლიერების პროექტის ფარგლებში კი, ამჟამად მიმდინარეობს ელექტრონული ბიბლიოთეკის მოწყობა, სალექციო დარბაზების აღჭურვა ვიდეოტრანსლირების სისტემებით. ასევე კეთდება დარბაზი იმიტირებული სასამართლო პროცესებისთვის.
საქართველოს პრეზიდენტის ადმინისტრაციის უფროსმა სასამართლო დამოუკიდებლობისა და სამოსამართლო ეთიკის აქტუალურ საკითხებზე გამართული საერთაშორისო კონფერენციის მონაწილეებს მიმართა. დავით პატარაიამ ყურადღება სასამართლო სისტემის დახვეწის აუცილებლობაზე გაამახვილა.
საქართველოს პრეზიდენტის სარეზერვო ფონდიდან გასულ წელს თანხა გამოიყო სახელმწიფოებრივი ინსტიტუტების გაძლიერებისთვის. ამ მხრივ, ბუნებრივია, უმნიშვნელოვანეს პრიორიტეტად განისაზღვრა სასამართლო ხელისუფლების დამოუკიდებლობისა და რეფორმების გაძლიერება. ამ მიმართულებით განხორციელდა სამი პროექტი, რომლებშიც უმთავრესი იყო და არის თითოეული მოსამართლე, რადგან მიგვაჩნია, რომ მოსამართლის დამოუკიდებლობის, მოსამართლის ღირსების გაძლიერება არის მნიშვნელოვანი საფუძველი სასამართლოს დამოუკიდებლობის გაძლიერებისათვის. ამ პროექტების მიზანიც სწორედ ეს იყო", - აღნიშნა პრეზიდენტის ადმინისტრაციის უფროსმა.
კონფერენციას ასევე ესწრებოდა საქართველოს პრეზიდენტის მრჩეველი ადამიანის უფლებებისა და მართლმსაჯულების საკითხებში კახა კოჟორიძე. მისი განცხადებით, სასამართლო დამოუკიდებლობის ხარისხის ზრდასთან დაკავშირებით პოზიტიური ცვლილებები შეინიშნება, თუმცა ამ საკითხზე მუშაობა მუდმივად არის საჭირო. როგორც მან აღნიშნა, საქართველოს პრეზიდენტმა ბევრი რამ გააკეთა ამ მიმართულებით და მომავალშიც აპირებს ხელი შეუწყოს აღნიშნულ პროცესს.
"ვფიქრობ, რომ ყველა პირი და ინსტიტუტი, რომელიც არის უფლებამოსილი ხელი შეუწყოს სასამართლოს დამოუკიდებლობას, ამისთვის უნდა ზრუნავდეს. საქართველოს პრეზიდენტი და პრეზიდენტის ინსტიტუტი ამ მიმართულებით ძალიან ბევრს აკეთებს. დღევანდელი ღონისძიება ამის ნათელი დადასტურებაა. სასამართლოს დამოუკიდებლობის ხარისხის გაზრდა, ერთიანი ეთიკური სტანდარტების დანერგვა ხელს შეუწყობს იმას, რომ საქართველოს ჰქონდეს უკეთესი სასამართლო, ვიდრე ჰქონდა გუშინ და ვიდრე აქვს დღეს", - განაცხადა პრეზიდენტის მრჩეველმა.
ფორუმის მუშაობაში მონაწილეობდნენ იუსტიციის უმაღლესი საბჭოს წევრები, მოსამართლეები, ადვოკატები, არასამთავრობო და საერთაშორისო ორგანიზაციების წარმომადგენლები, საქართველოში აკრედიტებული დიპლომატები.