საქართველოს საგარეო საქმეთა მინისტრმა, თამარ ბერუჩაშვილმა ამერიკის შეერთებულ შტატებში სამუშაო ვიზიტის ფარგლებში შეხვედრა გამართა „აშშ ატლანტიკური საბჭოს" დირექტორთა საბჭოს თავმჯდომარესთან, ჯონ ჰანტსმენთან.როგორც ,,ჯი-ეიჩ-ენს" საგარეო უწყებიდან აცნობეს მხარეებმა განიხილეს საკითხების ფართო სპექტრი, მათ შორის საქართველო-აშშ-ს სტრატეგიული პარტნიორობა, რეგიონში ამჟამად არსებული საფრთხეები, საქართველოს ხედვა მათი ეფექტიანად დაძლევის კუთხით და საერთაშორისო საზოგადოების როლი აღნიშნულ პროცესში.
საქართველოს საგარეო საქმეთა მინისტრმა ხაზი გაუსვა ამ მიმართუ-ლებით აშშ წამყვანი არასამთავრობო ორგანიზაციების და კვლევითი ცენტრების დიდ გამოცდილებას და ექსპერტიზას, და კმაყოფილებით აღნიშნა საქართველოს წარმატებული თანამშრომლობა „ატლანტიკურ საბჭოსთან." თავის მხრივ, ჯონ ჰანტსმენმა საქართველოსთან თანამშრომლობის შემდგომი გაღრმავებისათვის მზადყოფნა გამოთქვა.
მხარეები შეთანხმდნენ, რომ უწყვეტ რეჟიმში განაგრძობენ კომუნიკაციას თანამშრომლობის ახალი პერსპექტიული ფორმატების იდენტიფიცირების მიზნით.
