სამუშაო ჯგუფი 2015 წლის იანვარში ჩამოყალიბდა და დღეს რიგით მეორე შეხვედრა შედგა. ჯგუფი დაკომპლექტებულია: სახელდებისა და სიმბოლიკის კომისიის, მუნიციპალიტეტის მერიის კეთილმოწყობისა და არქიტექტურის საქალაქო სამსახურების ასევე საჯარო რეესტრის ეროვნული სააგენტოს სამისამართო სამსახურის წარმომადგენლებით.
სამუშაო ჯგუფი ყოველი კვირის პარასკევ დღეს შეიკრიბება სახელდების, ქუჩათა ქსელების მოწყობის, არსებული რუკების განახლების, შენობების ნუმერაციის, აღმნიშვნელი აბრების ნუმერაციის, მიმმართველი დგარების, სკვერების, ბაღების, პარკების, გზატკეცილების, გზაგამტარების, გაჩერებების და სხვა გეოგრაფიული ობიექტების აღმნიშვნელი ნიშნების განთავსების სრულყოფის და სინქრონული თანამშრომლობის მიზნით .
„სამწუხაროდ ჩვენს კომპეტენციაში შემავალი პრობლემები, რასაც უმისამართო თბილისი და პირადობის მოწმობის გარეშე დატოვებული თბილისელების დიდი უმრავლესობა ჰქვია იმ მძიმე მემკვიდრეობის ნაწილია რაც წინა ხელისუფლებამ დაგვიტოვა. ჩვენ გვსურს კომპლექსურად მივუდგეთ აღნიშნულ პრობლემებს, უახლოესი პერიოდის განმავლობაში გვაქვს საკმაოდ ამბიციური გეგმები. ჩვენი სამუშაო ჯგუფის ერთობლივი სურვილია თბილისი ვაქციოთ ევროპული ტიპის ქალაქად, სადაც გარემო მომსახურების სრული კომპლექტით ადაპტირებული და მორგებული იქნება ტურისტებზე. გაჩერებისა და ქუჩის ნომრის ძებნა აღარ მოუწევთ ადამიანებს და გადაადგილების პრობლემა აღარ შეექმნებათ."- აცხადებს სახელდებისა და სიმბოლიკის კომისიის თავმჯდომარე და საკრებულოს სამგორის რაიონის მაჟორიტარი დეპუტატი ლია ჯახველაძე.