სოფლის მეურნეობის მინისტრი ოთარ დანელია მიიჩნევს, რომ საგარეო უწყების ხელმძღვანელის თამარ ბერუჩაშვილის განცხადება არასწორი ინტერპრეტაციით გავრცელდა.
..მედიაში გავრცელებულ საგარეო საქმეთა მინისტრის განცხადებასთან დაკავშირებით, მინდა მოკლე კომენტარი გავაკეთო. ვფიქრობ, რომ საქმე გვაქვს არასწორ ინტერპრეტაციასთან. მოგეხსენებათ, საქართველოს მთავრობას გამიჯნული გვაქვს რუსეთთან პოლიტიკური და სავაჭრო-ეკონომიკური ურთიერთობების საკითხები. ამის შესახებ ქვეყნის პრემიერ-მინისტრმა არაერთხელ განაცხადა.შესაბამისად, სავაჭრო-ეკონომიკურ ნაწილში ურთიერთობები გრძელდება, რაც მნიშვნელოვანია ჩვენი მეწარმეებისთვის, ფერმერებისთვის, გლეხებისთვის.ვფიქრობ, საგარეო საქმეთა მინისტრი დამატებით განმარტებებს თავად გააკეთებს", _განმარტა დანელიამ.
საქართველოს საგარეო საქმეთა მინისტრის, თამარ ბერუჩაშვილის განცხადებით, საქართველოს ხელისუფლება „მახედ" მიიჩნევს რუსეთის ბაზარს. ბერუჩაშვილმა ამის შესახებ, ვაშინგტონში რადიო ,,თავისუფლების" კორესპონდენტთან საუბრისას განაცახდა.
„ახლა დროებით ვაჩერებთ რუსეთთან ვაჭრობის საკითხებზე ამ დიალოგს, მას აზრი არა აქვს. რუსეთს ნებისმიერ მომენტში შეუძლია, ისევ აამოქმედოს ემბარგო", _განაცხადა ბერუჩაშვილმა რადიო ,,თავისუფლების" კორესპონდენტთან საუბრისას.
ბერუჩაშვილის სიტყვებით, რუსეთი მნიშვნელოვან პოლიტიკურ საკითხებთან დაკავშირებითაც „განაგრძობს დესტრუქციულ ნაბიჯებს, რის უკანასკნელი ნათელყოფა იყო ნოემბერში მოსკოვში ე.წ. სტრატეგიული პარტნიორობისა და ინტეგრაციის შესახებ შეთანხმების ხელმოწერა სოხუმის საოკუპაციო რეჟიმთან".
