თბილისის მუნიციპალიტეტის საკრებულოს თავმჯდომარე გიორგი ალიბეგაშვილი და დედაქალაქის წარმომადგენლობითი ორგანოს დეპუტატი გულიკო ზუმბაძე სასტუმრო "ქორთიარდ მარიოტში" ჰოლოკოსტის მსხვერპლთა ხსოვნის დღისადმი მიძღვნილ ღონისძიებას დაესწრნენ.
საკრებულოს თავმჯდომარემ შეხვედრაზე მიწვეულ საზოგადოებას სიტყვით მიმართა და სიმბოლური სანთელი აანთო.
გიორგი ალიბეგაშვილმა ქართველი მღვდელი გრიგოლ ფერაძე გაიხსენა, რომელმაც არაერთი ნაბიჯი გადადგა ებრაელთა დასაცავად და საკუთარი სიცოცხლეც გაწირა მათ გადასარჩენად.
"დღეს კაცობრიობის წინაშე ჩადენილი ერთ-ერთი დიდი დანაშაულის, ჰოლოკოსტის საერთაშორისო დღეა. მიუხედავად იმისა, რომ საკონცენტრაციო ბანაკებში 6 მილიონამდე ებრაელის სიცოცხლე განადგურდა, დღევანდელ დღეს ვუსამძიმრებ, არა მხოლოდ ჩვენს მრავალსაუკუნოვან მოძმე ერს, არამედ მთელ კაცობრიობას. ვისურვებდი ასეთი დანაშაული არასდროს განმეორებულიყოს", - განაცხადა გიორგი ალიბეგაშვილმა.
საკრებულოს ადამიანის უფლებათა დაცვისა და სამოქალაქო ინტეგრაციის კომისიის თავმჯდომარემ გულიკო ზუმბაძემ ადამიანებსა და ერებს შორის სიყვარულსა და ურთიერთპატივისცემას გაუსვა ხაზი.
,,ეს დღე ყოველთვის უნდა ახსოვდეს კაცობრიობას, რათა არასოდეს არ განმეორდეს მსგავსი რამ. ჩვენ უნდა გვესმოდეს, რომ დედამიწა არის სახლი და ვერცერთი ერი ამ სახლს ვერ შეუცვლის ფორმას. ამიტომ ყველამ ერთმანეთს უნდა ვცეთ პატივი",- განაცხადა გულიკო ზუმბაძემ.
ჰოლოკოსტის მსხვერპლთა ხსოვნისადმი მიძღვნილი ღონისძიება სახალხო დამცველმა უჩა ნანუაშვილმა გახსნა, რომელმაც სტუმრებს მიმართა, წუთიერი დუმილით პატივი მიეგოთ ჰოლოკოსტის მსხვერპლთათვის.
ღონისძიებას ხელისუფლების, დიპლომატიური კორპუსის, საერთაშორისო და არასამთავრობო ორგანიზაციების წარმომადგენლები ესწრებოდნენ. სტუმრებმა სიმბოლური სანთლები აანთეს და კიდევ ერთხელ გაიხსენეს ჰოლოკოსტის დროს დაღუპული 6 მილიონი ებრაელი, 2 მილიონი ბოშა და ნაცისტური რეჟიმის ყველა სხვა მსხვერპლი