საქართველოს უმაღლესი სასწავლებლების ჟურნალისტიკის სკოლებისთვის სასწავლო ფილმები მომზადდა. ფონდი „ღია საზოგადოება - საქართველოს" დაფინანსებით, თომა ჩაგელიშვილის „თი-სტუდიო"-მ ჟურნალისტური ეთიკისა და სტანდარტების საკითხებზე ორი სასწავლო ფილმი შექმნა.
პროექტის „სასწავლო ფილმები ჟურნალისტური ეთიკისა და სტანდარტების დამკვიდრებისათვის" ფარგლებში მომზადებული ფილმები ქართული მედიიდან აღებულ ქეისებზე დაყრდნობით მომზადდა.
პროექტის ხელმძღვანელის, რეჟისორ თომა ჩაგელიშვილის თქმით, „მედიაეთიკა და სტანდარტები ფართო ცნებებია. ამდენად, მომავალი ჟურნალისტებისთვის ძალიან სასარგებლო იქნება ამ ტიპის სასწავლო ფილმების დანერგვა. ეს ხელს შეუწყობს სიღრმისეული ცოდნის, მაღალი პროფესიული უნარების მქონე ჟურნალისტების ახალი თაობების აღზრდას საქართველოში", - განაცხადა თომა ჩაგელიშვილმა.
მისივე თქმით, ქართული ჟურნალისტიკის ისტორიაში ეს პროექტი უპრეცენდენტოა. დღემდე მსგავსი ტიპის პრაქტიკული სახელმძღვანელოები მომავალი ჟურნალისტებისთვის არ შექმნილა.
ფონდი „ღია საზოგადოება - საქართველო" პროექტის ფარგლებში მომზადებული ფილმების პრეზენტაციას 28 იანვარს, 19:00 საათზე გამართავს კლუბ „ფრონტლაინში". პრეზენტაციაზე მიწვეული არიან ქართული უმაღლესი სასწავლებლების ჟურნალილსტიკის სკოლების ხელმძღვანელები, ლექტორები და მედიის ექსპერტები.