იური ვაზაგაშვილის საქმეში ჩართული დამოუკიდებელი ექსპერტი ზაზა ალთუნაშვილი განცხადებით, ვაზაგაშვილი საბრძოლო დანიშნულების ყუმბარის აფეთქების შედეგად დაიღუპა.
„ჩვენს მიერ ჩატარებულ იქნა ძალიან ბევრი სამუშაო; ამოღებული იქნა ნივთიერი მტკიცებულებები, რომელთა შეფასებები მთლიანობაში მოგვცემს საშუალებას დავადგინოთ, თუ რა გარემოებებში და რა ვითარებაში მოხდა აფეთქება. დადგენილია, ფაქტიურად, ასაფეთქებელი მოწყობილობის სახეობა, ზუსტდება თუ რა მოდელზეა საუბარი. ეს არის საბრძოლო დანიშნულების ასაფეთქებელი მოწყობილობა," - განაცხადა ალთუნაშვილმა.
იური ვაზაგაშვილი გუშინ, 20 იანვარს, შვილის, ზურაბ ვაზაგაშვილის საფლავზე გარდაცვლილი იპოვნეს. ის აფეთქების შედეგად დაიღუპა.
იური ვაზაგაშვილი წლების მანძილზე ითხოვდა 2006 წელს, სპეცოპერაციის შედეგად დაღუპული შვილის, ზურაბ ვაზაგაშვილის საქმის გამოძიებას, რომელიც ამ დრომდე არ არის დასრულებული.
