"ვიმპელკომი" ("ბილაინი") საქმიანობას საქართველოს სეპარატისტულ რეგიონებში აფხაზეთსა და ცხინვალის რეგიონში არ აპირებს და მათ "სადავო ტერიტორიებად" მიიჩნევს.
სატელეკომუნიკაციო კომპანიის "ვიმპელკომის" (რუსეთში _ ფიჭური კავშირგაბმულობის "ბილაინის" ოპერატორი) ვიცე-პრეზიდენტი დიმიტრი კრომსკი თავისი კომპანიის ინტერესებსა და ბიზნესზე საუბრისას, რუსულ მედიასთან საუბარში აფხაზეთსა და ე.წ. სამხრეთ ოსეთს "სადავო ტერიტორიებს" უწოდებს და აცხადებს, რომ არ იცის, მისი კომპანია იქ დაიწყებს ფუნქციონირებას თუ არა.
კითხვაზე პასუხის გაცემისას "არის თუ არა იმის შესაძლებლობა, რომ მისი კომპანია აფხაზეთსა და ე.წ. სამხრეთ ოსეთში დაიწყებს ფუნქციონირებას?" "ვიმპელკომის" ვიცე-პრეზიდენტი ასე პასუხობს: "ჩვენ დღეისათვის ბიზნესს ვაწარმოებთ საქართველოს ტერიტორიაზე, მაგრამ აფხაზეთსა და სამხრეთ ოსეთში არ ვართ, იმის გამო, რომ დღეისათვის ეს ტერიტორიები სადავო ტერიტორიებია".
აღსანიშნავია, რომ დღეისათვის ეს კომპანია უკვე მოქმედებს სომხეთში, ყაზახეთში, უზბეკეთში, ტაჯიკეთსა და უკრაინაში.
"ვიმპელკომი" ("ბილაინი") "ემ-ტე-ეს"-სა და "მეგაფონთან" ერთად, რუსეთში მოქმედ სამ უმსხვილეს კავშირგაბმულობის კომპანიის ნუსხაში შედის. აღსანიშნავია ასევე, რომ "მეგაფონი" უკვე მრავალი წელია რუსეთის მიერ ოკუპირებულ აფხაზეთსა და ცხინვალის რეგიონში მოქმედებს.
