შვეიცარიის ქალაქ სანკტ-მორიცის სათხილამურო სკოლიდან ლატვიის მოქალაქეობის მქონე პაველ გოგნიძე და მისი 5 წლის ვაჟი გააძევეს, - ამის შესახებ ინტერნეტპორტალ "ლენტას" თავად დაზარალებულმა აცნობა. გავრცელებული ინფორმაციით, გოგნიძე სკოლაში 4 წლის განმავლობაში ინსტრუქტორად მუშაობდა და საკუთარ ვაჟსაც იმავე სკოლაში ატარებდა, თუმცა მას შემდეგ, რაც გაირკვა, რომ ოჯახი რუსულ ენაზე საუბრობდა, სკოლის დირექტორმა მამა-შვილი სკოლიდან გააძევა. გოგნიძეს, მის მეუღლესა და ვაჟიშვილს სკოლის ტერიტორიაზე შესვლა აეკრძალათ. როგორც დაზარალებული ირწმუნება, მომხდარის შესახებ Swiss Snowsports-ს აცნობა, საიდანაც პასუხი მალე მიიღო. ორგანიზაციის განმარტებით, გადაწყვეტილებას სკოლაში თანამშრომლებისა და მოსწავლეების მიღება-გაშვების შესახებ დაწესებულების დირექტორი დამოუკიდებლად იღებს, რითაც კანონი არ ირღვევა.