9 აპრილის ბაღში საქართველოს სახალხო არტისტის, ოთარ მეღვინეთუხუცესის ძეგლი გაიხსნა. გამოჩენილი მსახიობის ძეგლის გახსნას თბილისის მერი დავით ნარმანია, საკრებულოს თავმჯდომარე გიორგი ალიბეგაშვილი, საკრებულოს განათლებისა და კულტურის, სახელდებისა და სიმბოლიკის კომისიების თავმჯდომარეები თამარ ტალიაშვილი და ლია ჯახველაძე, ასევე ,ფრაქციის "ქართული ოცნება "თავმჯდომარე რიმა ბერაძე, კულტურისა და ძეგლთა დაცვის მინისტრი, საზოგადო მოღვაწეები და მსახიობის ოჯახის წევრები და მეგობრები დაესწრნენ.
მსახიობის მეგობრებმა და ოფიციალურმა პირებმა ოთარ მეღვინეთუხუცესი გაიხსენეს და დამსწრე საზოგადოებას სიტყვით მიმართეს.
გიორგი ალიბეგაშვილმა თავის სიტყვაში მსგავსი ღონისძიებების მნიშვნელობაზე ისაუბრა და აღნიშნა, რომ სწორედ ასეთი დღეები ამშვენებენ და ალამაზებენ დედაქალაქს.
"ოთარი თავისი მდიდრული სევდიანი თვალებით, თითქოს, ფრესკაზე გამოსახულ ჩვენს წინაპრებს მოგაგონებდა. ამიტომაც უხდებოდა მას მეფე გიორგის და დათა თუთაშხიას როლები'',- განაცხადა გიორგი ალიბეგაშვილმა და ამ დონის ბუმბერაზი ადამიანისა და მსახიბის გარდაცვალების გამო გულისტკივილი კიდევ ერთხელ გამოთქვა.
"მიუხედავად ყველაფრისა, დღეს მაინც მისი დიდების დღეა'',-აღნიშნა საკრებულოს თავმჯდომარემ.
საკრებულოს დეპუტატებმა საქართველოს სახალხო არტისტის ძეგლი ყვავილებით შეამკეს.ოთარ მეღვინეთუხუცესი 2013 წლის 9 მაისს 81 წლის ასაკში გარდაიცვალა. საქართველოს სახალხო არტისტს, კინოსა და თეატრში რამდენიმე ათეული როლი აქვს შესრულებული. ოთარ მეღვინეთუხუცესს მინიჭებული აქვს რუსთაველის სახელობისა და საქართველოს სახელმწიფო პრემიები. 1979 წელს მიენიჭა საბჭოთა კავშირის სახალხო არტისტის წოდება. მსახიობი ასევე იყო არაერთი საერთაშორისო კონკურსის ლაურეატი.