თბილისის მუნიციპალიტეტის საკრებულოში ადამიანის უფლებათა დაცვისა და სამოქალაქო ინტეგრაციის კომისიის სხდომა გაიმართა, რომელზეც ქალთა და ბავშვთა უფლებების დაცვის საკოორდინაციო ცენტრის შექმნის შესახებ იმსჯელეს. სხდომას საკრებულოს თავმჯდომარე, სახალხო დამცველის აპარატისა და თბილისის მერიის წარმომადგენლები ესწრებოდნენ.
საკრებულოს თავმჯდომარემ, გიორგი ალიბეგაშვილმა საკოორდინაციო ცენტრის შექმნის ინიციატივას სრული მხარდაჭერა გამოუცხადა და განაცხადა, რომ ქალთა და ბავშვთა უფლებების დაცვის საკოორდინაციო ცენტრის შექმნა ხელს შეუწყობს მისი მუშაობის ეფექტიანობას.
კომისიის თავმჯდომარემ, გულიკო ზუმბაძემ კი კომისიის შექმნის მიზნობრიობაზე ისაუბრა. მისი თქმით, პირველ ეტაპზე, საკრებულოს დეპუტატთა და მერიის წარმომადგენელთა მონაწილეობით, უნდა შეიქმნას სამუშაო ჯგუფი. ზუმბაძის განმარტებით, ეს ჯგუფი შეიმუშავებს პლატფორმას, რომლის მიხედვითაც მერიის სისტემაში გაჩნდება ადმინისტრაციული რგოლი, რომელიც იმუშავებს ქალთა და ბავშვთა უფლებების დაცვის მიმართულებით.
„მერიაში ადმინისტრაციული რგოლის არსებობა ძალიან მნიშვნელოვანია იმ ორგანიზაციებთან კოორდინაციისთვის, რომლებიც ადამიანის უფლებათა დაცვის კუთხით მუშაობენ. მას ექნება უწყებათაშორისი გარკვეული სტატუსი და იქნება უკეთეს შედეგზე ორიენტირებული"- განაცხადა გულიკო ზუმბაძემ.
სახალხო დამცველის წარმომადგენლები ქალთა და ბავშვთა უფლებების დაცვის საკოორდინაციო ცენტრის შექმნის იდეას მიესალმნენ და სამუშაო სტრატეგიისა და ერთიანი მონაცემთა ბაზის შექმნის აუცილებლობაზე ისაუბრეს. სამომავლოდ მათ საკოორდინაციო ცენტრთან თანამშრომლობის სურვილი გამოთქვეს.
სხდომაზე გადაწყდა, რომ საკრებულო უახლოს მომავალში მიმართავს მერიას, რათა მათ ერთი თვის ვადაში წარმოადგინონ კონკრეტული პროექტი და ხედვა ქალთა და ბავშვთა უფლებების დაცვის კუთხით.
