ლაშა მახარაძის მკვლელობის საქმეზე ბრალდებული გიორგი ოქროპირიძე ყოფილ პრემიერ ბიძინა ივანიშვილს მიმართავს და აცხადებს, რომ მას შსს მინისტრის ალექსანდრე ჭიკაიძის ნათესავის გამო ჩაგრავენ. როგორც ოქროპირიძემ საქალაქო სასამართლოში განაცხადა ლაშა მახარაძის რეალურ მკვლელი ჭიკაიძის ნათესავია და მას ბრალი უსაფუძვლოდ აქვს წარდგენილი.
,,რატომ უნდა მომეკლა ლაშა მახარაძე, რომელთან ერთადაც გავიზარდე, ეს პროკურატურას დასაბუთებული არ აქვს. საქმის მასალებში წერია, თითქოს მახარაძესთან შეხვედრის დროს მე მას ვკითხე - მიცნო თუ არა. ეს არის სრული სისულელე, იქიდან გამომდინარე, რომ ლაშა მახარაძესთან ერთად გავიზარდე და ამას როგორ ვკითხავდი. რა ვქნა, რომ არ მყავს ისეთი ნათესავი, როგორიც მკვლელს ჰყავს. მინდა, ბიძინა ივანიშვილს ვუთხრა - ვიჩაგრები იმისთვის, რომ ვიღაცის ნათესავს ხელი დააფარონ", - განაცხადა გიორგი ოქროპირიძემ.
წინასასამართლო სხდომაზე ოქროპირიძემ მისთვის წაყენებული ბრალი უარყო და განაცხადა, რომ მასთან ერთად ამ საქმეში ბრალდებული ვლადიმერ ბერძენიშვილის საწინააღმდეგო ჩვენება იძულებით დააწერინეს.
ლაშა მახარაძე 2 სექტემბერს ვაკეში ჩაცხრილეს. მისი მკვლელობის ბრალდებით ერთი პირი - გიორგი ოქროპირიძეა დაკავებული.
