საქართველოს ეროვნული უშიშროების საბჭოს მდივანი პოლონეთის ეროვნული უშიშროების ბიუროს ხელმძღვანელს შეხვდა. როგორც ,,ჯი-ეიჩ-ენს" უშიშროების საპჭოს აპარატიდან აცნობეს შეხვედრაზე მხარეებმა თავდაცვისა და უსაფრთხოების სფეროში საქართველო-პოლონეთის თანამშრომლობისა და რეგიონალური უსაფრთხოების საკითხებზე, მათ შორის, უკრაინის კრიზისზე ისაუბრეს.
ირინე იმერლიშვილმა და სტანისლავ კოჟეიმ საქართველოს ნატოში ინტეგრაციასთან და ნატოს უელსის სამიტზე მიღებული გადაწყვეტილებების განხორციელებასთან დაკავშირებული საკითხები განიხილეს.
დღესვე ირინე იმერლიშვილმა და სტანისლავ კოჟეიმ ხელი მოაწერეს საქართველოს ეროვნული უშიშროების საბჭოს აპარატსა და პოლონეთის რესპუბლიკის ეროვნული უშიშროების ბიუროს შორის ურთიერთთანამშრომლობის პროტოკოლს, რომელიც უსაფრთხოების თანამედროვე გამოწვევების მიმართულებით გლობალურ, რეგიონალურ და ორმხრივ დონეზე ურთიერთობების გაღრმავებას ითვალისწინებს.
პროტოკოლი ითვალისწინებს რეგულარულ კონსულტაციებს შემდეგ საკითხებზე:უსაფრთხოებისა და თავდაცვის სფეროებში ორმხრივი თანამშრომლობა; ევროპულ და ევროატლანტიკურ სივრცეში ინტეგრაციის პროცესი, საქართველოს ევროკავშირში და ნატოში გაწევრიანებისკენ სწრაფვის კონტექსტში; რეგიონალური უსაფრთხოება, აღმოსავლეთ ევროპაში, მათ შორის სამხრეთ კავკასიაში ვითარების გათალისწინებით;ორმხრივი სამხედრო და სამხედრო-ტექნიკური თანამშრომლობა;სტრატეგიული დაგეგმარების პროცესში გამოცდილების გაზიარება;პროტოკოლის თანახმად, რეგულარული კონსულტაციები პოლონეთის რესპუბლიკის ეროვნული უშიშროების ბიუროსა და საქართველოს ეროვნული უშიშროების საბჭოს აპარატის ხელმძღვანელების, მათი მოადგილეების ან დეპარტამენტთა დირექტორების დონეზე უნდა განხორციელდეს სულ მცირე წელიწადში ერთხელ, მონაცვლეობით თბილისსა და ვარშავაში.როგორც ხელმოწერილ დოკუმენტშია აღნიშნული, მხარეები მიზნად ისახავენ ორ ქვეყანას შორის მეგობრული ურთიერთობების განმტკიცებასა და თანამშრომლობის გაღრმავებას და კმაყოფილებას გამოთქვამენ მხარეებს შორის წარსულში არსებული თანამშრომლობის მაღალი ხარისხის გამო, რომელიც დაფუძნებული იყო „ურთიერთთანამშრომლობის გეგმის" ორწლიან ფორმატზე;
საქართველოს ეროვნული უშიშროების საბჭოს მდივანი პოლონეთში საქართველოს ოფიციალური დელეგაციის შემადგენლობაში ეწვია.
