დედაქალაქის დელეგაციის ჩინეთის სახალხო რესპუბლიკაში ვიზიტი გრძელდება. ქალაქ ქეითუნის შემდეგ, საკრებულოს თავმჯდომარე გიორგი ალიბეგაშვილი, თბილისის მერი დავით ნარმანია და დედაქალაქის წარმომადგენლობითი ორგანოს დეპუტატები ქალაქ გუანჯოუს ესტუმრნენ და საერთაშორისო კონფერენციაში მიიღეს მონაწილეობა.
როგორც თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა აღნიშნა, კონფერენციამდე ხელი მოეწერა მემორანდუმს, რომლითაც კიდევ უფრო გამყარდა ორი ქალქის - თბილისისა და გუანჯოუს დამეგობრება.
ბიზნეს-კონფერენციაზე, რომელზეც მსოფლიოს 110 ქვეყნის დედაქალაქის მერია მიწვეული, ისეთი მნიშვნელოვანი თემები განიხილება, როგორიცაა საერთაშორისო ურთიერთობები, კულტურა, სპორტი, ეკონომიკა, ჯანდაცვა, ახალი ტექნოლოგიები და ექსპორტ-იმპორტი.
როგორც გიორგი ალიბეგაშვილმა აღნიშნა, გუანჯოუ თავისი მასშტაბურობით, წარმოებითა და ეკონომიკური განვითარებით უკვე სინგაპურს დაეწია და ჩინეთიდან ექსპორტის 60 პროცენტი სწორედ გუანჯოუდან ხორციელდება, ამიტომ მათი მხრიდან ქართული პროდუქციით დაინტერესება ქვეყნის ეკონომიკურ აღმავლობას შეუწყობს ხელს.
მისივე თქმით, საქართველო ტურიზმის კუთხით შეტანილია ჩინეთის ხელსაყრელ ქვეყნებს შორის, რაც საქართველოში ტურისტების მოზიდვას და შემოსავლების გაზრდას გულისხმობს.
საკრებულოს თავმჯდომარემ ასევე აღინიშნა რომ, ჩინური მხარე ქართული ღვინით დაინტერესდა და უკვე მიმდინარეობს საკითხის განხილვა, რომელიც ღვინის კოეფიციენტის დაწევას გულისხმობს.
"გუანჯოუ ავსტრალიისა და ჩილეს ღვინით მარაგდება და ექსპორტის ტარიფი 12,8 კოეფიციენტს შეადგენს. ქართული ღვინის ბაზარზე შეტანისთვის კი კოეფიციენტი 48,5 -ს აღწევს. ვინაიდან ჩინეთისთვის უკვე ცნობილი გახდა ქართული ღვინის ისტორია და წარსული, ჩვენმა მასპინძლებმა გამოთქვეს სურვილი საქართველოში წარმოებული ღვინის კოეფიციენტი გაუთანაბრდეს ავსტრალიისა და ჩილეს სასმელს, რაც ხელსაყრელი იქნება ქართული ბიზნესის განვითარებისთვის",- განაცახადა საკრებულოს თავმჯდომარემ.
გიორგი ალიბეგაშვილმა აბრეშუმის გზის ისტორიულ მნიშვნელობაზეც ისაუბრა და აღნიშნა, რომ აუცილებელია ჩვენი ქვეყანა მაქსიმალურად მზად დახვდეს მიმდინარე პროცესებს. საკრებულოს თავმჯდომარის თქმით, გზამ, რომელმაც ჩინეთი - ხმელთაშუა და შავი ზღვების სანაპიროებთან დააკავშირა, ხელი შეუწყო აღმოსავლეთ და დასავლეთ ქვეყნებს შორის ეკონომიკური და კულტურული ურთიერთობის განვითარებას. მათი გამოცდილება კი, საქართველოსთვის ვაჭრობისა და ტურიზმის სფეროში სერიოზული წარმატების საწინდარი გახდება.
"კონფერენციაზე წარმოდგენილ ქვეყნებს შორის საქართველოს ღირსეული ადგილი უკავია, რადგან აბრეშუმის სამი უმნიშვნელოვანესი გზიდან, ერთ-ერთი საქართველოზე გაივლის. ამიტომ, ჩვენ მაქსიმალურად უნდა ავუწყოთ ფეხი ეკონომიკურ ტემპს, რათა ამ პროცესის მონაწილე გავხდეთ",- განაცხადა გიორგი ალიბეგაშვილმა.
დღევანდელ კონფერენციაზე პოსტსაბჭოთა ქვეყნებიდან სიტყვით გამოსვლის საშუალება მხოლოდ საქართველოსა და რუსეთს მიეცა.
"დღეს კიდევ კარგად გამოჩნდა, რომ მსოფლიოს ერთ-ერთი ლიდერი ქვეყნისთვის საქართველოს ღირსეული ადგილი უკავია. ამიტომ ეს საშუალება, რომელიც ხელშეკრულების გაფორმებით დაგვირგვინდა, შესაფერისად უნდა გამოვიყენოთ", - განაცხადა გიორგი ალიბეგაშვილმა.
ბიზნეს კონფერენცია დღის ბოლომდე გაგრძელდება, ხვალ კი ქართული დელეგაცია გუანჯოუს ბიზნეს სექტორის წარმომადგენლებს შეხვდება.