შეუძლებელია პრეზიდენტის შეუზღუდავი დისკრეცია იქნას განმარტებული, როგორც დანაშაული და უფლებამოსილების ბოროტად გამოყენება, - ამის შესახებ, ადვოკატმა ოთარ კახიძემ ჟურნალისტებს მისი დაცვის ქვეშ მყოფი, ექსპრეზიდენტ მიხეილ სააკაშვილისთვის სანდრო გირგვლიანის საქმეზე ბრალის დამძიმების შეფასებისას განუცხადა.
"შეუძლებელია სამართლებრვად პრეზიდენტის შეუზღუდავი დისკრეცია იქნას განმარტებული, როგორც დანაშაული და უფლებამოსილების ბოროტად გამოყენება.
პრეზიდენტის გადაწყვეტილების შეფასება შესაძლებელი პოლიტიკურ ჭრილში. შეიძლება ვინმე დაეთანხმოს, ან არ დაეთანხმოს ამ გადაწყვეტილებას და შეაფასოს იგი მორალური თვასაზრისით, მაგრამ, მინდა ხაზი გავუსვა, სამართლებრივად არავითარი პერსპექტივა ამ სისხლის სამართლის საქმეს ნორმალური სასამართლოს პირობებში არ აქვს", - განცხადა ოთარ კახიძემ.
საქართველოს ყოფილ პრეზიდენტს, მიხეილ სააკაშვილს სანდრო გირგვლიანის საქმეზე ბრალი დღეს წარუდგინა.
როგორც პროკურატურის განცახდებაშია აღნიშნული, ალექსანდრე გირგვლიანის საქმეზე ახალი გარემოებების გამორკვევა და მიხეილ სააკაშვილისათვის ბრალდების გამოტანა მოხდა სტარსბურგის ადამიანის უფლებათა ევროპული სასამართლოს მიერ მიღებული გადაწყვეტილების საფუძველზე, საქართველოს პროკურატურის მიერ ჩატარებული განახლებული გამოძიების ფარგლებში, რომელსაც სტრასბურგის სასამართლოს გადაწყვეტილების აღსრულების პროცესში ზედამხედველობას უწევს ევროსაბჭოს მინისტრთა კომიტეტი.
უწყების ინფორმაციით, საქმეზე გრძელდება გამოძიება სამსახურებრივი უფლებამოსილების ბოროტად გამოყენების მუხლით, რაც გათვალისწინებულია საქართველოს სისხლის სამართლის კოდექსის 332-ე მუხლის მეორე ნაწილით, რომელიც სასჯელად ითვალისწინებს თავისუფლების აღკვეთას 3-დან 5 წლამდე ვადით
