სასჯელაღსრულების მინისტრის მოადგილის კახა კახიშვილის განცხადებით, სასჯელაღსრულების მერვე დაწესებულებაში პატიმრების შესაძლო ცემის ფაქტთან დაკავშირებით გამოძიებას სასჯელაღსრულების სამინისტროს ნაცვლად პროკურატურა ჩაატარებს. კახიშვილმა საგანგებო ბრიფინგზე აღნიშნული გადაწყვეტილების მიზეზებიც განმარტა.
,,რამდენადაც თქვენთვის ცნობილია გუშინ გახმაურდა ფაქტი რომელმაც ძალიან სერიოზულად აგვაღელვა, ააღელვა საზოგადოება. ამიტომ კითხვის ნიშნები რომ არ დარჩენოდა საზოგადოებას გამოძიებასთან დაკავშირებით, მივიღეთ გადაწყევტილება იმის მიუხედავად, რომ კანონი გვაძლევდა საშუალებას ეს საქმე ამავე სამინისტროში გამოგვეძიებინა, მაგრამ ისიც გავითვალისწინეთ რომ საზოგადოებად დარჩებოდა კითხვები შიდა უწყებაში საქმესთან დაკავშირებით, ეს საქმე შემდგომი გამოძიების მიზნით გადავაგზავნეთ საქართველოს მთავარ პროკურატურაში. Aაქედან გამომდინარე ეს საქმე მთავარ პროკურატურას აქვს, ის აწარმოებს გამოძიებას და რა თქმა უნდა, გამოძიების შედეგებს დაველოდებით", - განაცხადა კახიშვილმა.
საქართველოს სახალხო დამცველმა სასჯელაღსრულების #8 დაწესებულებაში განთავსებულ პირთა მიმართ განხორციელებული შესაძლო არასათანადო მოპყრობის ფაქტზე გამოძიების გუშინ წინადადებით მიმართა საქართველოს მთავარ პროკურორს. როგორც სახალხო დამცცველის აპარატის კიერ გავრცელებულ განცხადებაშია აღნიშნული 2014 წლის 12 ნოემბერს საქართველოს სახალხო დამცველის რწმუნებულებმა სასჯელაღსრულების დეპარტამენტის N8 დაწესებულებაში მონიტორინგისას გონივრული მიღებისა და განთავსების განყოფილებიდან ყვირილისა და ჩხუბის ხმა მოესმათ. ინციდენტის ადგილზე რწმუნებულებს დახვდნენ ამავე დაწესებულების დირექტორის მოადგილე და ადმინისტრაციის თანამშრომლები. დერეფანში სისხლის ლაქა შეინიშნებოდა. დაწესებულების თანამშრომლები სახალხო დამცველის რწმუნებულთა დანახვამ გააღიზიანა.
საქართველოს სახალხო დამცველის რწმუნებულების კატეგორიული მოთხოვნის შედეგად, დაწესებულების თანამშრომლებმა მათ საშუალება მისცეს ენახათ საშხაპე ოთახში დაკავებული მსჯავრდებული მ.ფ. და ბრალდებული მ.უ.
ორივე დაკავებული სველი ტანსაცმლით იწვნენ იატაკზე. მ.უ.-ს ხელ-ფეხი ერთმანეთზე სპეციალური ჯაჭვით ჰქონდა მიბმული. ორივე პატიმარს გარეგნულად აღენიშნებოდა ძალადობის კვალი, მათ შორის, სახეზე. მ.უ.-ს შუბლის არეში ჰქონდა ნაკვეთი ჭრილობა, საიდანაც მოსდიოდა სისხლი, ასევე, სხვა მრავლობითი დაზიანებები, ხოლო მ.ფ.-ს მარჯვენა თვალში აღენიშნებოდა სისხლჩაქცევა.
საქართველოს სახალხო დამცველი მოითხოვს მსჯავრდებულ მ.ფ.-სა და ბრალდებულ მ.უ.-ს მიმართ განხორციელებულ შესაძლო არასათანადო მოპყრობის ფაქტზე გამოძიება დაუყოვნებლივ დაიწყოს და აწარმოოს საქართველოს მთავარმა პროკურატურამ; დროულად ჩატარდეს სასამართლო-სამედიცინო ექსპერტიზა ბრალდებულების სხეულზე არსებული დაზიანებების ხარისხის, ხასიათის, ხანდაზმულობის, წარმოშობისა და განვითარების მექანიზმის დასადგენად; საგამოძიებო ორგანომ დროულად ამოიღოს მითითებული ფაქტის ამსახველი ვიდეო-ჩანაწერები.
